പ്രകൃതി ദുരന്തങ്ങളിലോ മറ്റ് അപകടങ്ങളിലോ സുപ്രധാന രേഖകൾ നഷ്ടപ്പെടുന്നതൊഴിവാക്കാൻ കേന്ദ്ര സർക്കാർ ഡിജിറ്റല്‍ ഇന്ത്യ പദ്ധതിയുടെ ഭാഗമായി അവതരിപ്പിച്ച ഡിജിലോക്കർ സംവിധാനം പ്രയോജനപ്പെടുത്താം. സര്‍ട്ടിഫിക്കറ്റുകൾ, ഔദ്യോഗിക രേഖകള്‍ തുടങ്ങിയവ ഡിജിറ്റല്‍ ലോക്കറിലേക്ക് ഉടൻ മാറ്റാം.
രേഖകൾ കയ്യിൽ കൊണ്ടുനടക്കുന്നതിന് പകരം, സർക്കാരിന്റെ ഡിജിലോക്കർ, എംപരിവാഹൻ തുടങ്ങിയ ആപ്ലിക്കേഷനുകളിൽ അപ്ലോഡ് ചെയ്‌താൽ മതി. ആവശ്യമുള്ളപ്പോൾ അവ നിങ്ങളുടെ സ്മാർട്ട് ഫോണിൽ നിന്ന് ആക്സസ് ചെയ്യാം.
വാഹന പരിശോധനയ്ക്ക് ഡ്രൈവിംഗ് ലൈസൻസ്, രജിസ്ട്രേഷൻ സർട്ടിഫിക്കറ്റ്, ഇൻഷുറൻസ് എന്നിവയുടെ ഇലക്ട്രോണിക് അഥവാ ഡിജിറ്റൽ രേഖ കാണിച്ചാൽ മതിയെന്ന് സംസ്ഥാന ഗതാഗത വകുപ്പുകൾക്കും, ട്രാഫിക് പോലിസിനും കേന്ദ്ര ഗതാഗത മന്ത്രാലയം ഈയിടെ നിർദേശം നൽകിയിരുന്നു.
എന്താണ് ഡിജിലോക്കർ?
ഡിജിലോക്കർ സർക്കാർ പുറത്തിറക്കിയ ഒരു മൊബീൽ ആപ്ലിക്കേഷനാണ്. വെബ്സൈറ്റും ലഭ്യമാണ്. നമ്മുടെ പ്രധാനപ്പെട്ട എല്ലാ രേഖകളും ഇലക്ട്രോണിക് രൂപത്തിലാക്കി സൂക്ഷിക്കാൻ സഹായിക്കുന്ന സുരക്ഷിതമായ ഒരു ആപ്ലിക്കേഷനാണ് ഇത്. ഇങ്ങനെ സൂക്ഷിച്ചാൽ രേഖകൾ നഷ്ടപ്പെടുമെന്നോ, നശിച്ചു പോകുമെന്നോ ഉള്ള ഭയം വേണ്ട.
എങ്ങനെ ഉപയോഗിക്കാം
- ഡിജിലോക്കർ വെബ്സൈറ്റ് സന്ദർശിക്കുകയോ, അല്ലെങ്കിൽ സ്മാർട്ട് ഫോണിൽ ആപ്പ് ഡൗൺലോഡ് ചെയ്യുകയോ ചെയ്യാം.
- അതിനു ശേഷം നിങ്ങളുടെ ആധാർ നമ്പറോ മൊബീൽ നമ്പറോ ഉപയോഗിച്ചോ ഒരു യൂസർ ഐഡി ക്രിയേറ്റ് ചെയ്യുക. OTP വെരിഫിക്കേഷൻ ഉണ്ടാകും.
- നിങ്ങളുടെ ഒറിജിനൽ രേഖകളുടെ സ്‌കാൻ ചെയ്ത കോപ്പികൾ (PDF, JPEG or PNG format) വെബ്സൈറ് വഴിയോ ആപ്പ് വഴിയോ അപ്ലോഡ് ചെയ്യുക.
- പിന്നീട് ഏത് സ്ഥലത്തുനിന്നു വേണമെങ്കിലും ഈ രേഖകൾ നമുക്ക് ആക്സസ് ചെയ്യാവുന്നതാണ്.
- ഇൻകം ടാക്‌സ് വകുപ്പ്, സിബിഎസ്ഇ, രജിസ്ട്രാർ ഓഫീസ് തുടങ്ങിയ ചില സ്ഥാപങ്ങൾക്ക് നമ്മുടെ രേഖകൾ നേരിട്ട് നമ്മുടെ ഇ -ലോക്ക റിലേയ്ക്ക് അപ്ലോഡ് ചെയ്യാൻ കഴിയും.
- മറ്റുള്ളവരുമായി രേഖകൾ ഷെയർ ചെയ്യാനുള്ള സംവിധാനവും ഇതിലുണ്ട്.
- UIDAI, കേന്ദ്ര ഗതാഗത മന്ത്രാലയം, വിദ്യാഭ്യാസ ബോർഡുകൾ, ഇൻകം ടാക്‌സ് വകുപ്പ് തുടങ്ങിയ പല സ്ഥാപങ്ങളും ഇതിൽ രജിസ്റ്റർ ചെയ്തിട്ടുണ്ട്.
സർക്കാരിന്റെ കണക്കനുസരിച്ച് ഏകദേശം 1.35 കോടി പേർ ഡിജിലോക്കർ സംവിധാനം ഉപയോഗിക്കുന്നുണ്ട്. പാൻ കാർഡ്, മാർക്ക് ഷീറ്റുകൾ, ജാതി സർട്ടിഫിക്കറ്റ്, ജനന സർട്ടിഫിക്കറ്റ്, റേഷൻ കാർഡ് തുടങ്ങിയ നിരവധി രേഖകളാണ് ഇവർ ഇതിൽ സൂക്ഷിക്കുന്നത്.