ക്രൂഡ് വില കുതിച്ചുപാഞ്ഞിട്ടും അനക്കമില്ലാതെ രാജ്യത്തെ ഇന്ധനവില; യുപിയിലെ ഈ കണക്കും കാരണമാകാം

ഇത്ര ദീര്‍ഘനാള്‍ പെട്രോള്‍, ഡീസല്‍ വില വര്‍ധനയില്ലാതെയിരിക്കുന്നത് ഏറെക്കാലത്തിന് ശേഷം ഇതാദ്യമായാണ്.

തെരഞ്ഞെടുപ്പ് കഴിയുന്നതോടെ എന്തായാലും വില വര്‍ധന വരികതന്നെ ചെയ്യും. പെട്രോള്‍, ഡീസല്‍ വില ലിറ്ററിന് 18-20 രൂപ വരെ ഉയര്‍ന്നാലും അത്ഭുതപ്പെടാനില്ല, തലചുറ്റി വീഴരുതെന്ന മുന്നറിയിപ്പാണ് പല നിരീക്ഷകരും നല്‍കുന്നത്.

അതിനിടെ രാജ്യസഭയില്‍ ഇന്നലെ എണ്ണ, പ്രകൃതി വാതക വകുപ്പ് സഹമന്ത്രി രാമേശ്വര്‍ തെലി എഴുതി സമര്‍പ്പിച്ച മറുപടിയിലെ കണക്കുകളും ശ്രദ്ധേയമാണ്.

യുപിയില്‍ എത്ര പെട്രോള്‍ പമ്പുകള്‍?

രാജ്യത്തെ മൊത്തം പെട്രോള്‍ പമ്പുകളില്‍ 12 ശതമാനം ഇപ്പോള്‍ തെരഞ്ഞെടുപ്പ് നടക്കുന്ന ഉത്തര്‍പ്രദേശിലാണ്. സഹമന്ത്രിയുടെ മറുപടിയിലാണ് ഈ വിവരമുള്ളത്. 2022 ജനുവരി ഒന്നിലെ കണക്ക് പ്രകാരം രാജ്യത്തെ പൊതു, സ്വകാര്യമേഖലാ എണ്ണ വിതരണ കമ്പനികള്‍ക്ക് മൊത്തം 81,099 റീറ്റെയ്ല്‍ ഔട്ട്‌ലെറ്റുകളാണുള്ളത്. യുപിയില്‍ മാത്രമുള്ളത് 9,942 പെട്രോള്‍ പമ്പുകള്‍. 7,468 എണ്ണവുമായി മഹാരാഷ്ട്രയാണ് രണ്ടാമത്.