കല്യാണ്‍ ജൂവലേഴ്‌സ് മൂന്നാം പാദ ലാഭം 148 കോടി രൂപ
ഗള്‍ഫ് മേഖലയില്‍ കമ്പനിയുടെ വിറ്റുവരവ് 641 കോടി രൂപയായി
നടപ്പ് സാമ്പത്തിക വര്‍ഷം മൂന്നാം പാദത്തില്‍ കല്യാണ്‍ ജൂവലേഴ്‌സിന്റെ ആകെ വിററുവരവ് 13 ശതമാനം വളര്‍ച്ചയോടെ 3884 കോടി രൂപയായി ഉയര്‍ന്നു. മുന്‍ വര്‍ഷം ഇതേ കാലയളവില്‍ ഇത് 3435 കോടി രൂപയായിരുന്നുവെന്ന് കമ്പനി പ്രസ്താവനയിൽ പറഞ്ഞു. വരുമാനം (EBITDA) 327 കോടി രൂപ രേഖപ്പെടുത്തി. മുന്‍ വര്‍ഷം ഇതേ പാദത്തില്‍ ഇത് 299 കോടി രൂപയായിരുന്നു. മുന്‍ വര്‍ഷത്തെ 135 കോടി രൂപയെ അപേക്ഷിച്ച് അവലോകന പാദത്തില്‍ മൊത്ത ലാഭം 148 കോടി രൂപയായി ഉയര്‍ന്നു.
ഇന്ത്യയില്‍ നിന്നും
കമ്പനിയുടെ ഇന്ത്യയില്‍ നിന്നുള്ള വിറ്റുവരവ് മുന്‍ വര്‍ഷത്തെ 2880 കോടി രൂപയില്‍ നിന്ന് മൂന്നാം പാദത്തില്‍ 3219 കോടി രൂപയായി. ഇന്ത്യയിലെ വ്യാപാരത്തില്‍ നിന്ന് മാത്രമുള്ള വരുമാനം (EBITDA) 276 കോടി രൂപയായി ഉയര്‍ന്നു. അവലോകന പാദത്തില്‍ ഇന്ത്യയില്‍ നിന്നുള്ള മൊത്ത ലാഭം മുന്‍ വര്‍ഷത്തെ 118 കോടി രൂപയില്‍ നിന്ന് 133 കോടി രൂപയായി ഉയര്‍ന്നു.
തിളങ്ങി ഗൾഫ് മേഖല
ഗള്‍ഫ് മേഖലയില്‍ കമ്പനിയുടെ വിറ്റുവരവ് 515 കോടി രൂപയില്‍ നിന്ന് 641 കോടി രൂപയായി ഉയര്‍ന്നു. കമ്പനിയുടെ മൊത്തം വിറ്റുവരവിന്റെ 16.5 ശതമാനം ഗള്‍ഫ് മേഖലയില്‍ നിന്നാണ്. ഗള്‍ഫ് മേഖലയില്‍ നിന്നുള്ള വരുമാനം (EBITDA) 52 കോടി രൂപയാണ്. കഴിഞ്ഞ വര്‍ഷം അത് 46 കോടി രൂപയായിരുന്നു. ഗള്‍ഫ് മേഖലയില്‍ 17 കോടി രൂപ ലാഭം രേഖപ്പെടുത്തി. കമ്പനിയുടെ പ്രവര്‍ത്തനം വളരെ സംതൃപ്തി നല്‍കുന്നുവെന്നും ആത്മവിശ്വാസത്തോടെയാണ് മുന്നോട്ടുനീങ്ങുന്നതെന്നും കല്യാണ്‍ ജൂവലേഴ്‌സ് എക്‌സിക്യൂട്ടീവ് ഡയറക്ടര്‍ രമേശ് കല്യാണരാമന്‍ പറഞ്ഞു.
ഇ-കോമേഴ്‌സ്
ഇ-കോമേഴ്‌സ് വിഭാഗമായ കാന്‍ഡിയറിന്റെ മൂന്നാം പാദ വിറ്റുവരവ് 44 കോടി രൂപയാണ്. കഴിഞ്ഞ വര്‍ഷം ഇത് 47 കോടി രൂപയായിരുന്നു. ഇ പാദത്തില്‍ കാന്‍ഡിയര്‍ 1.7 കോടി രൂപ നഷ്ടം രേഖപ്പെടുത്തി. കഴിഞ്ഞ വര്‍ഷം ഇതേ പാദത്തില്‍ 26 ലക്ഷം ലാഭത്തിലായിരുന്നു കാന്‍ഡിയര്‍. മൂന്നാം പാദത്തില്‍ കല്യാണ്‍ ജൂവലേഴ്‌സ് ആറു പുതിയ ഷോറൂമുകള്‍ കൂടി തുറന്നു. കമ്പനിക്ക് 2022 ഡിസംബര്‍ 31 വരെ ഇന്ത്യയിലും ഗള്‍ഫ് രാജ്യങ്ങളിലുമായി 169 ഷോറൂമുകളുണ്ട്.