യുഎഇ ആസ്ഥാനമായി പ്രവര്‍ത്തിക്കുന്ന റീട്ടെയ്ല്‍ പ്രമുഖരായ ലുലു ഗ്രൂപ്പ് തമിഴ്നാട്ടില് 3,500 കോടി രൂപയുടെ നിക്ഷേപത്തിനൊരുങ്ങുന്നു. തമിഴ്നാട്ടില് ഷോപ്പിംഗ് മാളുകളും ഹൈപ്പര്‍മാര്‍ക്കറ്റുകളും ഫുഡ്-ലോജിസ്റ്റിക് പാര്‍ക്കും സ്ഥാപിക്കുന്നതിനായി 3,500 കോടി രൂപയുടെ നിക്ഷേപം നടത്തുമെന്ന് ലുലു ഗ്രൂപ്പ് തിങ്കളാഴ്ച വ്യക്തമാക്കി. ഇത് സംബന്ധിച്ച ധാരണാപത്രത്തില്‍ തമിഴ്നാട് ഇന്‍ഡസ്ട്രിയല്‍ ഗൈഡന്‍സ് ആന്‍ഡ് എക്സ്പോര്‍ട്ട് പ്രൊമോഷന്‍ ബ്യൂറോ മാനേജിംഗ് ഡയറക്ടറും സിഇഒയുമായ പൂജ കുല്‍ക്കര്‍ണിയും ലുലു ഗ്രൂപ്പ് എക്സിക്യൂട്ടീവ് ഡയറക്ടര്‍ അഷ്റഫ് അലി എംഎയും ഒപ്പുവെച്ചതായി കമ്പനി പ്രസ്താവനയില്‍ പറഞ്ഞു. തമിഴ്നാട് മുഖ്യമന്ത്രി എംകെ സ്റ്റാലിന്‍, വ്യവസായ മന്ത്രി തങ്കം തേനരസു, ലുലു ഗ്രൂപ്പ് ചെയര്‍മാന്‍ യൂസഫലി എം.എ എന്നിവരുടെ സാന്നിധ്യത്തിലാണ് ധാരണാപത്രത്തില്‍ ഒപ്പുവെച്ചത്.
ധാരണാപത്രം അനുസരിച്ച്, ആദ്യ ഷോപ്പിംഗ് മാള്‍ 2024 ഓടെ ചെന്നൈയില്‍ ഒരുക്കും. ആദ്യ ഹൈപ്പര്‍മാര്‍ക്കറ്റ് ഈ വര്‍ഷാവസാനത്തോടെ കോയമ്പത്തൂരിലെ ലക്ഷ്മി മില്‍സ് കോമ്പൗണ്ടില്‍ തുറക്കുമെന്നാണ് പ്രതീക്ഷിക്കുന്നത്. മിഡ്ല്‍ ഈസ്റ്റ് രാജ്യങ്ങളിലേക്കുള്ള കയറ്റുമതിക്കായി കാര്‍ഷികോല്‍പ്പന്നങ്ങള്‍ സംഭരിക്കാനും സംസ്‌കരിക്കാനുമുള്ള ഭക്ഷ്യ സംസ്‌കരണ, ലോജിസ്റ്റിക്സ് കേന്ദ്രങ്ങള്‍ സ്ഥാപിക്കാനും പദ്ധതിയുണ്ട്്. ലൊക്കേഷനുകളും അനുബന്ധ നടപടിക്രമങ്ങളും അന്തിമമാക്കുന്നതിനായി ലുലുവില്‍ നിന്നുള്ള ഉന്നതതല പ്രതിനിധി സംഘം ഉടന്‍ തമിഴ്നാട് സന്ദര്‍ശിക്കുമെന്നാണ് റിപ്പോര്‍ട്ടുകള്‍.
''അടുത്ത മൂന്ന് വര്‍ഷത്തിനുള്ളില്‍ തമിഴ് യുവാക്കള്‍ക്ക് പ്രത്യക്ഷമായും പരോക്ഷമായും 15,000 തൊഴിലവസരങ്ങള്‍ നല്‍കുകയാണ് ഞങ്ങളുടെ ലക്ഷ്യം'' യൂസഫ് അലി പറഞ്ഞതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.
ലുലു ഗ്രൂപ്പിന് കീഴില്‍ നിലവില്‍ മിഡില്‍ ഈസ്റ്റ്, ഈജിപ്ത്, ഇന്തോനേഷ്യ, മലേഷ്യ, ഇന്ത്യ എന്നിവിടങ്ങളിലായി 225-ലധികം ഹൈപ്പര്‍മാര്‍ക്കറ്റുകളും ഷോപ്പിംഗ് മാളുകളും പ്രവര്‍ത്തിക്കുന്നു. ആഗോളതലത്തില്‍ 57,000-ത്തിലധികം ആളുകളാണ് ഈ ഗ്രൂപ്പില്‍ ജോലി ചെയ്യുന്നത്. അടുത്തിടെ, ഷോപ്പിംഗ് മാള്‍ സ്ഥാപിക്കുന്നതിനായി ലുലു ഗ്രൂപ്പ് അഹമ്മദാബാദിന് സമീപം 2,000 കോടി രൂപയുടെ നിക്ഷേപ പദ്ധതി പ്രഖ്യാപിച്ചിരുന്നു. ഉത്തര്‍പ്രദേശിലെ ഗ്രേറ്റര്‍ നോയിഡയില്‍ ഭക്ഷ്യ സംസ്‌കരണ പ്ലാന്റ് സ്ഥാപിക്കാന്‍ 500 കോടി രൂപയുടെ നിക്ഷേപവും വാഗ്ദാനം ചെയ്തിട്ടുണ്ട്.
