അദാനി ഓഹരികളുടെ ഇടിവ് തുടരുന്നു

ഹിന്‍ഡന്‍ബെര്‍ഗ് റിപ്പോര്‍ട്ടിന് ശേഷം കഴിഞ്ഞ ഒരു മാസമായി അദാനി ഓഹരികള്‍ക്ക് തകര്‍ച്ചയില്‍ നിന്ന് കരകയറാന്‍ സാധിക്കുന്നില്ല. ജനുവരി 24ന് അദാനി ഓഹരികളുടെ വിപണി മൂല്യം 19.19 ലക്ഷം കോടി രൂപയായിരുന്നത് നിലവില്‍ 63% ഇടിഞ്ഞ് 7.15 ലക്ഷം രൂപയായി.

തുറമുഖങ്ങള്‍, ഊര്‍ജം, സിമെന്റ്, വിമാനത്താവളങ്ങള്‍, ഭക്ഷ്യ എണ്ണ തുടങ്ങി വൈവിധ്യമായ മേഖലകളിലാണ് അദാനി ഗ്രൂപ്പിന്റെ നിക്ഷേപം.

അദാനി എന്റര്‍പ്രൈസസ്

തിങ്കളാഴ്ച അദാനി എന്റര്‍പ്രൈസസ് ഓഹരി 9 ശതമാനത്തില്‍ അധികം ഇടിഞ്ഞ് 1193 രൂപ. ഓഹരി മൂല്യം 2.46 ലക്ഷം രൂപ കുറഞ്ഞു. അദാനി ഗ്രീന്‍ എനര്‍ജി 4.99% കുറഞ്ഞ് 462.45 രൂപ, അദാനി പോര്‍ട്‌സ് 0.46 % കുറഞ്ഞ് 556.50 രൂപ, അദാനി പവാര്‍ 4.9 % ഇടിവ് രേഖപ്പെടുത്തി 139.50 രൂപയായി. അദാനി ടോട്ടല്‍ ഗ്യാസ് 5 % താഴ്ന്ന് 715.95 കോടി രൂപ എന്ന നിലയിലെത്തി. അദാനി വില്‍മാര്‍ 5% ഇടിഞ്ഞ് 344.20 രൂപയുമായി.

അദാനിക്ക് നിക്ഷേപമുള്ള സിമെന്റ് കമ്പനിയായ എസിസി കമ്പനിയുടെ ഓഹരിയും തകര്‍ച്ചയിലാണ്. അദാനി ഗ്രൂപ്പ പ്രതിസന്ധികള്‍ മറികടന്ന് തിരിച്ചുവരവിനുള്ള തന്ത്രങ്ങള്‍ ആവിഷ്‌കരിച്ചുവരികയാണ്. സിംഗപ്പൂര്‍ ആസ്ഥാനമായുള്ള പത്തിലേറെ ആഗോള ബാങ്കുകളുമായി ഗ്രൂപ്പ് ചര്‍ച്ചകള്‍ നടത്തിക്കൊണ്ടിരിക്കുകയാണ്.