രാജ്യത്തെ വമ്പന്‍ ഐ.പി.ഒയ്ക്ക് ഒരുങ്ങി മുകേഷ് അംബാനിയുടെ റിലയന്‍സ് ഗ്രൂപ്പ്, ലക്ഷ്യം ₹40,000 കോടിയുടെ സമാഹരണം
പ്രീ-ഐ.പി.ഒ പ്ലേസ്‌മെന്റിനായുള്ള ചര്‍ച്ചകള്‍ നടക്കുന്നതായി റിപ്പോര്‍ട്ട്
ശതകോടീശ്വരന്‍ മുകേഷ് അംബാനി നയിക്കുന്ന റിലയന്‍സ് ഇന്‍ഡസ്ട്രീസിനു കീഴിലുള്ള റിലയന്‍സ് ജിയോ ഇന്‍ഫോകോം (RJio) പ്രാരംഭ ഓഹരി വില്‍പ്പനയ്ക്ക് (IPO) ഒരുങ്ങുന്നു. രാജ്യം കണ്ട ഏറ്റവും വമ്പന്‍ ഇഷ്യുവായിരിക്കുമിതെന്നാണ് അറിയുന്നത്. 35,000-40,000 കോടി രൂപയാണ് സമാഹരിക്കാന്‍ ലക്ഷ്യമിടുന്നത്. ഹ്യുണ്ടായ് മോട്ടോഴ്‌സ് ഇന്ത്യയുടെ ഐ.പി.ഒയാണ് രാജ്യത്ത് ഇതുവരെയുള്ള ഏറ്റവും വമ്പന്‍ ഐ.പി.ഒ.
നിലവിലുള്ള ഓഹരിയുടമകളുടെ ഓഹരികള്‍ വിറ്റഴിക്കുന്ന ഓഫര്‍ ഫോര്‍ സെയില്‍ (ഒ.എഫ്.എസ്) കൂടാതെ പുതു ഓഹരികളുടെ വില്‍പ്പനയും പ്രീ ഐ.പി.ഒ പ്ലേസ്‌മെന്റുമുണ്ടാകുമെന്നാണ് റിപ്പോര്‍ട്ടുകള്‍. ഈ വര്‍ഷം രണ്ടാം പാതിയോടെ ഐ.പി.ഒ നടത്താനാണ് റിലയന്‍സ് ഗ്രൂപ്പ് പദ്ധതിയിടുന്നത്.
പുതുഓഹരികളും ഒ.എഫ്.എസും
പുതു ഓഹരികളുടെ വലിപ്പമനുസരിച്ചായിരിക്കും പ്രീ-ഐ.പി.ഒ പ്ലേസ്‌മെന്റ് നടക്കുക. ഒ.എഫ്.എസ്, ഫ്രഷ് ഇഷ്യു എത്രവീതമെന്നതാണ് ഇനിയും തീരുമാനിക്കാനിരിക്കുന്നതേയുള്ളു.
ജിയോ കൂടാതെ ടാറ്റ ഗ്രൂപ്പിന്റെ ടാറ്റ ക്യാപിറ്റില്‍, എല്‍.ജി ഇലക്ട്രോണിക്‌സ്, ഇ-കൊമേഴ്‌സ് വമ്പനായ ഫ്‌ളിപ്കാര്‍ട്ട് എന്നിവയും ഈ വര്‍ഷം ഐ.പി.ഒയുമായി രംഗത്തെത്തുന്നുണ്ട്.