2000 രൂപ നോട്ടുകള്‍ അപ്രത്യക്ഷമാകുമോ? സത്യം എന്താണ്
കഴിഞ്ഞ രണ്ട് വര്‍ഷമായി പുതിയ 2000 രൂപ നോട്ടുകള്‍ അച്ചടിച്ചിട്ടില്ല. നിരോധനം വരുമോ? അറിയാം.
2000 രൂപ നോട്ടുകള്‍ക്ക് പ്രചാരം കുറയുന്നു എന്നതരത്തില്‍ വാര്‍ത്തകള്‍ പുറത്തുവന്നതിനുശേഷം നോട്ടുകളെക്കുറിച്ച് വീണ്ടും ആശങ്ക പരക്കുകയാണ്. കഴിഞ്ഞ രണ്ടു വര്‍ഷമായി 2000 രൂപ നോട്ടുകള്‍ അച്ചടിക്കുന്നില്ല എന്നതു തന്നെയാണ് ഇതിന് കാരണം. കേന്ദ്ര സഹ ധനമന്ത്രി അനുരാഗ് സിംഗ് താക്കൂര്‍ ആയിരുന്നു ലോക്സഭയില്‍ ഈ വിവരം അറിയിച്ചത്. നോട്ട് അച്ചടിക്കലിനെക്കുറിച്ച് തെറ്റായ വാര്‍ത്തകള്‍ പുറത്തുവന്നാല്‍ തിരുത്തലുമായി വരുന്ന റിസര്‍വ് ബാങ്കും ഇക്കാര്യം തിരുത്തിയിട്ടില്ല.
പൊതുജനങ്ങളുടെ ആവശ്യകത കണക്കിലെടുത്ത് സര്‍ക്കാരും ആര്‍ബിഐയും ചേര്‍ന്നാണ് പുതിയ കറന്‍സികള്‍ അച്ചടിക്കാനുള്ള തീരുമാനം എടുക്കുന്നത്. ഉയര്‍ന്ന മൂല്യമുള്ള നോട്ടുകള്‍ക്ക് ആവശ്യക്കാരില്ല എന്നത് അച്ചടി നിര്‍ത്താന്‍ പ്രധാനമായും കാരണമായതെന്നും അദ്ദേഹം വ്യക്തമാക്കിയിട്ടുണ്ട്.
നോട്ട് നിരോധനത്തിന് ശേഷമായിരുന്നു രണ്ടായിരത്തിന്റെ പുതിയ നോട്ട് രാജ്യത്ത് നിലവില്‍ വരുന്നത്. 2016 നവംബര്‍ 10 ന് ആയിരുന്നു അത്. നിലവില്‍ ഇന്ത്യയില്‍ അച്ചടിക്കുന്ന ഏറ്റവും ഉയര്‍ന്ന തുകയുടെ നോട്ട് എന്ന നിലയിൽ 2000 രൂപ നോട്ട് ആദ്യ കാലത്ത് തിളങ്ങിയെങ്കിലും പതിയെ നോട്ടിന്റെ ഡിമാൻഡ് മെല്ലെ കുറഞ്ഞു.