ജിഎസ്ടി റിട്ടേണ്‍ ഫയല്‍ ചെയ്യാന്‍ കേരളത്തിന് കൂടുതല്‍ സമയം
പ്രളയക്കെടുതിയുടെ പശ്ചാത്തലത്തിൽ കേരളത്തിലുള്ളവര്‍ക്ക് ജിഎസ്ടി റിട്ടേണ്‍ ഫയല്‍ ചെയ്യേണ്ട അവസാന തീയതി കേന്ദ്ര ധന മന്ത്രാലയം നീട്ടി. കേരളത്തിന് പുറമെ മാഹി, കുഡഗ് എന്നീ പ്രദേശങ്ങള്‍ക്കും ഇളവ് നല്‍കിയിട്ടുണ്ട്.
ജൂലൈ മാസത്തിലേക്കുള്ള ജിഎസ്ടിആര്‍3B (GSTR-3B) ഫോം സമര്‍പ്പിക്കുന്നതിനുള്ള അവസാന തീയതി ഓഗസ്റ്റ് 20 ല്‍ നിന്ന് ഒക്ടോബര്‍ 5 ലേയ്ക്ക് മാറ്റിയിട്ടുണ്ട്. ഓഗസ്റ്റ് മാസത്തേക്കുള്ള ജിഎസ്ടിആര്‍3B ഒക്ടോബര്‍ 10 ന് മുന്‍പ് ഫയല്‍ ചെയ്താല്‍ മതിയാവും.
ഒന്നര കോടി രൂപയ്ക്ക് താഴെ വിറ്റുവരവുള്ള ബിസിനസുകള്‍ തങ്ങളുടെ ജൂലൈ-സെപ്റ്റംബര്‍ പാദത്തിലേക്കുള്ള ജിഎസ്ടിആര്‍-1 നവംബര്‍ 15 ന് മുന്‍പ് നല്‍കിയാല്‍ മതി. മറ്റുള്ളവര്‍ക്ക് ജൂലൈ മാസത്തിലെ GSTR-1 ഒക്ടോബര്‍ 5 ന് മുന്‍പും ഓഗസ്റ്റിലേത് ഒക്ടോബര്‍ 10 ന് മുന്‍പും ഫയല്‍ ചെയ്താല്‍ മതി.
അതേസമയം, ദുരിതാശ്വാസത്തിനായുള്ള സാധങ്ങളുടെ ഇറക്കുമതിക്കും വിതരണത്തിനുമുള്ള അടിസ്ഥാന കസ്റ്റംസ് തീരുവയും IGST യും സംസ്ഥാന റവന്യു വകുപ്പ് ഒഴിവാക്കിയിട്ടുണ്ട്.