ചെന്നൈയില്‍ ഐഫോണ്‍ നിര്‍മിക്കാന്‍ തായ്‌വാന്‍ കമ്പനി
വന്‍കിട രാജ്യാന്തര നിര്‍മാണക്കമ്പനികളുടെ ഇഷ്ടയിടമായി മാറിക്കൊണ്ടിരിക്കുകയാണ് തമിഴ്‌നാട്
ആപ്പ്ള്‍ ഐ ഫോണുകളുടെ ഏറ്റവും വലിയ ഉല്‍പ്പാദകരിലൊന്നായ പെഗാട്രോണ്‍ കോര്‍പറേഷന്‍ ഇന്ത്യയില്‍ 1100 കോടിയോളം രൂപ നിക്ഷേപിക്കാനൊരുങ്ങുന്നു. തായ്‌വാനീസ് കമ്പനിയായ പെഗാട്രോണ്‍ ഇതിനായി ചെന്നൈയിലെ കാസ ഗ്രാനേഡ് ഇന്‍ഡസ്ട്രിയില്‍ പാര്‍ക്കില്‍ അഞ്ചു ലക്ഷം ചതുരശ്രയടിയിലുള്ള സൗകര്യം പാട്ടത്തിനെടുത്തതായാണ് റിപ്പോര്‍ട്ട്. കമ്പനിക്ക് കീഴിലുള്ള പെഗാട്രോണ്‍ ടെക്‌നോളജി ഇന്ത്യയുടെ കീഴിലായിരിക്കും കമ്പനി ഇന്ത്യയില്‍ ഐഫോണ്‍ നിര്‍മാണം നടത്തുക. മറ്റൊരു ഐഫോണ്‍ നിര്‍മാണ കമ്പനിയായ വിസ്‌ട്രോണിന്റെ ബാംഗളൂരിലെ ഫാക്റ്ററിയില്‍ നടന്ന അക്രമസംഭവങ്ങളും ചെന്നൈയില്‍ നിക്ഷേപം നടത്താന്‍ കമ്പനിയെ പ്രേരിപ്പിച്ചുവെന്നാണ് റിപ്പോര്‍ട്ട്. തമിഴ്‌നാട് സര്‍ക്കാര്‍ നല്‍കുന്ന വിവിധ ആനുകൂല്യങ്ങളും മികച്ച ഗതാഗത സൗകര്യങ്ങളും തീരുമാനത്തിന് ബലമേകി. മറ്റൊരു കമ്പനിയായ ഫോക്‌സ്‌കോണും തമിഴ്‌നാട് ആസ്ഥാനമായി തന്നെയാണ് പ്രവര്‍ത്തിക്കുന്നത്.