'മാസപ്പടി' കേസിനിടെ സി.എം.ആര്‍.എല്ലിന് അടുത്ത അടി; നാലാം പാദം നഷ്ടത്തിൽ
വരുമാനവും കുറഞ്ഞു, ഓഹരി ഇന്ന് ഇടിവില്‍
Image : CMRL website and Canva
മാസപ്പടി വിവാദം നേരിടുന്ന ആലുവയിലെ പ്രമുഖ കെമിക്കല്‍ ഉത്പന്ന നിര്‍മാതാക്കളായ കൊച്ചിന്‍ മിനറല്‍സ് ആൻഡ് റൂട്ടൈല്‍ ലിമിറ്റഡ് (CMRL) കഴിഞ്ഞ സാമ്പത്തിക വര്‍ഷത്തെ (2023-24) നാലാം പാദമായ ജനുവരി-മാര്‍ച്ചില്‍ രേഖപ്പെടുത്തിയത് 6.92 കോടി രൂപയുടെ നഷ്ടം. മുന്‍ സാമ്പത്തിക വര്‍ഷത്തെ സമാനപാദത്തില്‍ 12.99 കോടി രൂപലാഭം രേഖപ്പെടുത്തിയ സ്ഥാനത്താണിത്. ഇക്കഴിഞ്ഞ ഡിസംബര്‍ പാദത്തില്‍ ലാഭം 10.08 കോടി രൂപയായിരുന്നു.
ഗള്‍ഫിലേക്കും അന്വേഷണം
സി.എം.ആര്‍.എല്‍ ഉള്‍പ്പെട്ട പണമിടപാട് കേസില്‍ വിദേശ ബാങ്ക് അക്കൗണ്ട് കേന്ദ്രീകരിച്ച് സീരിയസ് ഫ്രോഡ് ഇന്‍വെസ്റ്റിഗേഷന്‍ ഓഫീസ് (എസ്.എഫ്.ഐ.ഒ) അന്വേഷണം ആരംഭിച്ചിട്ടുണ്ട്. സി.എം.ആര്‍.എല്‍-എക്‌സാലോജിക് ഇടപാടില്‍ അന്വേഷണ ഏജന്‍സികളുടെ നിരീക്ഷണിത്തിലായിരുന്ന അബുദബിയിലെ ബാങ്ക് അക്കൗണ്ടിലേക്ക് രണ്ട് വിദേശ കമ്പനികള്‍ വന്‍ തുക നിക്ഷേപിച്ചെന്ന വിവരങ്ങളുടെ അടിസ്ഥാനത്തിലാണ് അന്വേഷണം.