ബംഗളൂരുവില്‍ അത്യാധുനിക മള്‍ട്ടി-സ്‌പെഷ്യാലിറ്റി ആശുപത്രിയുമായി ആസ്റ്റര്‍
വൈറ്റ്ഫീല്‍ഡിലാണ് പുതിയ ആശുപത്രി; മികവായി നിരവധി നൂതന ചികിത്സാ സൗകര്യങ്ങള്‍
Image : asterhospitals.in
ഇന്ത്യയിലെയും ജി.സി.സിയിലെയും പ്രമുഖ ആശുപത്രി ശൃംഖലയായ ആസ്റ്റര്‍ ഡി.എം ഹെല്‍ത്ത്‌കെയര്‍ (Aster DM Healthcare) ബംഗളൂരുവിലെ വൈറ്റ്ഫീല്‍ഡില്‍ 506 കിടക്കകളോട് കൂടിയതും അത്യാധുനിക സൗകര്യങ്ങളുള്ളതുമായ മള്‍ട്ടി-സ്‌പെഷ്യാലിറ്റി ആശുപത്രി തുറന്നു. ബംഗളൂരുവില്‍ ആസ്റ്ററിന്റെ മൂന്നാം മള്‍ട്ടി-സ്‌പെഷ്യാലിറ്റി ആശുപത്രിയാണിത്; ഇന്ത്യയിലെ 19-ാമത്തെയും.
ആസ്റ്ററിന്റെ ഇന്ത്യ ബിസിനസ് വില്‍ക്കുന്നു?
മലയാളിയായ ഡോ. ആസാദ് മൂപ്പന്‍ നേതൃത്വം നല്‍കുന്ന ആസ്റ്റര്‍ ഡി.എം ഹെല്‍ത്ത്‌കെയര്‍ ഇന്ത്യയിലെ ബിസിനസുകള്‍ വില്‍ക്കാന്‍ ഒരുങ്ങുന്നതായി സൂചനകളുണ്ട്. ആസ്റ്ററിന്റെ ഇന്ത്യയിലെ ആസ്തികള്‍ ഏറ്റെടുക്കാന്‍ പ്രൈവറ്റ് ഇക്വിറ്റി സ്ഥാപനങ്ങളായ ബി.പി.ഇ.എ ഇ.ക്യു.ടി (BPEA EQT), ഒന്റാറിയോ ടീച്ചേഴ്‌സ് പെന്‍ഷന്‍ പ്ലാന്‍ (OTTP), ബ്ലാക്ക്‌സ്‌റ്റോണ്‍ തുടങ്ങിയവ താത്പര്യം പ്രകടിപ്പിച്ചതായാണ് റിപ്പോര്‍ട്ടുകള്‍.
ആസ്റ്ററിന്റെ ഇന്ത്യാ വിഭാഗം ബിസിനസിന് ഏകദേശം 150 കോടി ഡോളര്‍ (12,500 കോടി രൂപ) മൂല്യം കണക്കാക്കിയാകും ഏറ്റെടുക്കല്‍ നടപടിയെന്നും സൂചനകളുണ്ട്. ആസ്റ്റര്‍ ഡി.എം ഹെല്‍ത്ത്‌കെയറിന്റെ ഓഹരികള്‍ ഇന്ന് വ്യാപാരത്തിന്റെ ആദ്യ സെഷനില്‍ 0.27 ശതമാനം നേട്ടത്തോടെ 330.45 രൂപയിലാണുള്ളത്.