ജിയോ ഫിനാന്‍ഷ്യല്‍ സര്‍വീസ് ഓഹരികളില്‍ സംഭവിക്കുന്നതെന്ത്?
ലിസ്റ്റിംഗിനു ശേഷം മൂന്നാം വ്യാപാരദിനത്തിലും ഓഹരി 5% ലോവര്‍ സര്‍കീട്ടില്‍, നിക്ഷേപകര്‍ക്ക് നഷ്ടം 23,700 കോടി രൂപ
Image : Canva
സ്റ്റോക്ക് എക്‌സ്‌ചേഞ്ചില്‍ ലിസ്റ്റ് ചെയ്ത ജിയോ ഫിനാന്‍ഷ്യല്‍ സര്‍വീസസ് (ജെ.എഫ്.എസ്) ഓഹരികള്‍ തുടര്‍ച്ചയായ മൂന്നാം വ്യാപാര സെഷനിലും 5 ശതമാനം ലോവര്‍ സര്‍കീട്ടിലായി. ആഗസ്റ്റ് 21 നാണ് റിലയന്‍സ് ഇന്‍ഡസ്ട്രീസില്‍ നിന്ന് വേര്‍പെട്ട ധനകാര്യ കമ്പനിയായ ജിയോ ഫിനാന്‍ഷ്യല്‍ സര്‍വീസസ് ഓഹരികള്‍ സ്റ്റോക്ക് എക്‌സ്‌ചേഞ്ചില്‍ ലിസ്റ്റ് ചെയ്തത്. ബി.എസ്.ഇയില്‍ 265 രൂപയ്ക്കും എന്‍.എസ്.ഇയില്‍ 262 രൂപയ്ക്കുമാണ് ഓഹരി ലിസ്റ്റ് ചെയ്തത്.
അടിസ്ഥാനപരമായ കാരണങ്ങളേക്കാള്‍ സാങ്കേതികമായ കാരണങ്ങളാണ് ഓഹരിയില്‍ ഇടിവുണ്ടാക്കുന്നെന്നാണ് ഓഹരി വിപണി നിരീക്ഷകരുടെ അഭിപ്രായം. ഇന്‍ഡെക്‌സ് ഫണ്ടുകളുടെ വില്‍പ്പനയാണ് ഓഹരി വില ഇടിയാന്‍ പ്രാധന കാരണം. സൂചികയില്‍ ഉള്‍പ്പെടാത്ത ഓഹരികള്‍ ഇന്‍ഡെക്‌സ് ഫണ്ടുകള്‍ക്ക് കൈവശം വയ്ക്കാനാകില്ല. അതിനാല്‍ ജെ.എഫ്.എസ് ഓഹരികള്‍ ഇന്‍ഡെക്‌സ് ഫണ്ടുകള്‍ക്ക് വില്‍ക്കേണ്ടതുണ്ട്.
കുറച്ചു കൂടി വ്യക്തമായി പറഞ്ഞാൽ റിലയന്‍സ് ഇന്‍ഡസ്ട്രീസ് നിഫ്റ്റിയുടെയും മറ്റ് പ്രധാന സൂചികകളുടെയും ഭാഗമാണ്. അത്തരം സൂചികകള്‍ പിന്തുടരുന്ന ഇന്‍ഡെക്‌സ് ഫണ്ടുകള്‍ക്കും വിഭജന ശേഷം ഒന്നിനൊന്നെന്ന കണക്കില്‍ ജിയോ ഫിനാന്‍ഷ്യല്‍ സര്‍വീസസിന്റെ ഓഹരികള്‍ ലഭിച്ചിട്ടുണ്ട്. സൂചികയില്‍ നിന്ന് ജെ.എഫ്.എസ് ഒഴിവാക്കപ്പെടുമ്പോള്‍ ഈ ഫണ്ടുകള്‍ക്ക് ഈ ഓഹരികള്‍ വിൽക്കേണ്ടി വരും.
സൂചികകളില്‍ തുടരുന്നു
എന്നാല്‍ നിലവില്‍ കമ്പനി പ്രവര്‍ത്തനമൊന്നും നടത്തുകയോ വരുമാനം നേടുകയോ ചെയ്യുന്നില്ല. റിലയന്‍സ് ഇന്‍ഡസ്ട്രീല്‍ ജെ.എഫ്.എസിനുള്ള 6.1 ശതമാനം , അതയാത് 41.3 കോടി ഓഹരികളാണ് കമ്പനിയുടെ മൂല്യത്തിന്റെ മുഖ്യപങ്കും. ഏകദേശം 1.04 ലക്ഷം കോടി രൂപ വരുമിത്.