ഐഇഎക്‌സ് നിക്ഷേപകര്‍ക്കൊരു സന്തോഷവാര്‍ത്ത, ബോണസ് ഓഹരിക്ക് ബോര്‍ഡിന്റെ ശുപാര്‍ശ

2021 സാമ്പത്തിക വര്‍ഷത്തിലെ കമ്പനിയുടെ ലാഭത്തില്‍നിന്ന് നീക്കിവച്ച കരുതല്‍ ശേഖരത്തില്‍നിന്ന് തുക ചെലവഴിച്ചാണ് ബോണസ് ഓഹരികള്‍ നല്‍കുന്നത്. ബോണസ് ഇഷ്യു പ്രകാരം, ഒരു രൂപ മുഖവിലയുള്ള 59,91,13,022 ഇക്വിറ്റി ഷെയറുകളാണ് നിക്ഷേപകര്‍ക്ക് കൈമാറുക. നിലവില്‍, 1 രൂപ മുഖവിലയുള്ള 29,95,56,511 ഓഹരികളാണ് കമ്പനിക്കുള്ളത്. ബോണസ് മീറ്റിംഗ് കഴിഞ്ഞ് രണ്ട് മാസത്തിനുള്ളില്‍ (2021 ഡിസംബര്‍ 20 നുള്ളില്‍) ബോണസ് ഓഹരികള്‍ ക്രെഡിറ്റ് ചെയ്യുകയോ അയയ്ക്കുകയോ ചെയ്യുമെന്നാണ് പ്രതീക്ഷിക്കുന്നത്.

നിലവില്‍, 779 രൂപ (22-10-2021, 11.15) യാണ് ഐഇഎക്‌സിന്റെ ഒരു ഒഹരിയുടെ വില. രണ്ട് ദിവസങ്ങള്‍ക്ക് മുമ്പ് 20 ശതമാനം വര്‍ധനയോടെ ഏറ്റവും ഉയര്‍ന്ന നിരക്കായ 956 തൊട്ടെങ്കിലും ഓഹരി വില കുത്തനെ ഇടിയുകയായിരുന്നു. ബോണസ് ഇഷ്യു കമ്പനി ശുപാര്‍ശ ചെയ്തതിന് പിന്നാലെ ഇന്ന് 21 രൂപയോളമാണ് ഓഹരി വില ഉയര്‍ന്നത്.

അതേസമയം, നടപ്പുസാമ്പത്തിക വര്‍ഷത്തിലെ രണ്ടാം പാദത്തില്‍ മികച്ച നേട്ടമാണ് കമ്പനി നേടിയത്. അറ്റാദായം 75 ശതമാനം വര്‍ധിച്ച് 77 കോടി രൂപയായി. മുന്‍പാദത്തിലെ ഇത് 44.33 കോടി രൂപയായിരുന്നു. മൊത്തം വരുമാനം കഴിഞ്ഞ കാലയളവിലെ 78.71 കോടി രൂപയില്‍ നിന്ന് 122.30 കോടി രൂപയായും ഉയര്‍ന്നു.