2500 കോടിയുടെ നിക്ഷേപ പദ്ധതികളുമായി ഐടിസി
രണ്ട് വര്‍ഷത്തിനുള്ളില്‍ രാജ്യത്തിന്റെ വിവിധ ഭാഗങ്ങളിലായി അഞ്ച് പ്ലാന്റുകള്‍ സ്ഥാപിക്കാനാണ് കമ്പനി ലക്ഷ്യമിടുന്നത്
Photo : ITC / Website
അടുത്ത രണ്ട് വര്‍ഷത്തിനുള്ളില്‍ 2500 കോടിയുടെ നിക്ഷേപ പദ്ധതികളുമായി ഐടിസി (ITC). ഗുജറാത്തിലെ നദിയാദില്‍ അത്യാധുനിക പാക്കേജിംഗ് പ്ലാന്റ് ഉള്‍പ്പെടെ രാജ്യത്തിന്റെ വിവിധ ഭാഗങ്ങളില്‍ അഞ്ച് പുതിയ പ്ലാന്റുകള്‍ സ്ഥാപിക്കാനാണ് 2,500 കോടി രൂപയുടെ നിക്ഷേപത്തിലൂടെ കമ്പനി ലക്ഷ്യമിടുന്നത്. കൊല്‍ക്കത്ത ആസ്ഥാനമായുള്ള മള്‍ട്ടിബിസിനസ് കമ്പനിയുടെ പ്രീമിയം ആഡംബര ഹോട്ടലായ ഐടിസി നര്‍മദ (ITC Narmada) അഹമ്മദാബാദില്‍ ഉദ്ഘാടനം ചെയ്ത ശേഷം മാധ്യമപ്രവര്‍ത്തകരോട് സംസാരിക്കവെ ഐടിസി ചെയര്‍മാന്‍ സഞ്ജീവ് പുരിയാണ് (Sanjiv Puri) ഇക്കാര്യം വ്യക്തമാക്കിയത്. കര്‍ണാടകയിലെ മൈസൂരില്‍ ഒരു നിക്കോട്ടിന്‍ ഡെറിവേറ്റീവുകളുടെ നിര്‍മാണ കേന്ദ്രം, തെലങ്കാനയിലെ മേഡക് ജില്ലയില്‍ ഒരു ഭക്ഷ്യ സംസ്‌കരണ പ്ലാന്റ്, പശ്ചിമ ബംഗാളിലെ ഉലുബേരിയയില്‍ ഒരു ഉപഭോക്തൃ ഉല്‍പ്പന്ന പ്ലാന്റ് എന്നിവയും കമ്പനി സ്ഥാപിക്കും. എന്നാല്‍ ഓരോ പ്ലാന്റിനുമായി എത്ര തുക നിക്ഷേപിക്കുമെന്ന് പുരി വ്യക്തമാക്കിയില്ല.