ആവേശക്കുതിപ്പിൽ 18,000 കടന്നു നിഫ്റ്റി, സെൻസെക്സ് 60,000 നു മുകളിൽ; വളർച്ച സൂചനകൾ തൃപ്തികരം; വിദേശികൾ വീണ്ടും ഉത്സാഹത്തിൽ

ഇന്ത്യൻ വിപണി ഇന്നലെ നല്ല ആവേശത്തോടെ ഉയർന്നു. വിദേശ നിക്ഷേപകർ ഉത്സാഹപൂർവം ഓഹരികൾ വാങ്ങാൻ എത്തിയത് ഇതിനു സഹായിച്ചു. നിഫ്റ്റി 18,000-ൻ്റെയും സെൻസെക്സ് 60,000-ൻ്റെയും കടമ്പകൾ കടന്നു. അതേ സമയം യുഎസ് വിപണി ഫെഡ് തീരുമാനം ആസന്നമായതിൻ്റെ ആശങ്ക കാണിച്ചു ചെറിയ താഴ്ചയിലായി. ഡോളർ വീണ്ടും ഉയർന്നതോടെ രൂപയടക്കമുള്ള കറൻസികൾക്കു തിരിച്ചടിയായി.

സിംഗപ്പുർ എക്സ്ചേഞ്ചിലെ ഡെറിവേറ്റീവ് വ്യാപാരത്തിൽ എസ്ജി എക്സ് നിഫ്റ്റി ഇന്നലെ 18,096-ൽ ക്ലോസ് ചെയ്തു. ഇന്നു രാവിലെ സൂചിക ഉയർന്ന് 18,175-ലെത്തി. ഇന്ത്യൻ വിപണി നേട്ടത്തോടെ തുടങ്ങും എന്നാണ് ഇതിലെ സൂചന. 

ഇന്നു വലിയ ചാഞ്ചാട്ടമില്ലാത്ത ഒരു ദിവസമാകും വിപണിക്ക് എന്നാണു പ്രതീക്ഷ. മുഖ്യ സൂചികകൾ റിക്കാർഡ് നിലയിലേക്കു കയറാവുന്ന ഒരു ബുളളിഷ് ആവേശം വിപണിയിൽ ദൃശ്യമാണ്.

ഇന്നലെ യൂറോപ്യൻ വിപണികൾ നേട്ടത്തിൽ നിന്നു ചെറിയ നഷ്ടത്തിലേക്കിറങ്ങിയാണു ക്ലോസ് ചെയ്തത്. വ്യാപാര സമയത്തിനു ശേഷം പുറത്തു വന്ന കണക്കു യൂറോപ്പിൽ 10.9 ശതമാനം ചില്ലറ വിലക്കയറ്റമുണ്ടെന്നു കാണിച്ചു. ബ്രിട്ടനിൽ സൂചിക താഴ്ചയിൽ നിന്നു കയറി ക്ലാേസ് ചെയ്തു. 

യുഎസ് വിപണി താഴ്ന്നു തുടങ്ങി താഴ്ചയിൽ അവസാനിക്കുകയായിരുന്നു. എങ്കിലും ഡൗ ജോൺസ് സൂചിക 1976-നു ശേഷമുള്ള ഏറ്റവും മികച്ച മാസത്തിനാണു സമാപനം കുറിച്ചത്. കഴിഞ്ഞ മാസം ഡൗ 13.95 ശതമാനം ഉയർന്നു. ടെക് കമ്പനികളുടെ പ്രകടനം മോശമായതിനാൽ നാസ്ഡാക് സൂചിക 3.9 ശതമാനം പ്രതിമാസ നേട്ടമേ ഉണ്ടാക്കിയുള്ളു. 

ഇന്നു രാവിലെ ഓസീസ്, ഏഷ്യൻ വിപണികൾ മിതമായ നേട്ടത്തിലാണ്. കറൻസി വീണ്ടും താഴ്ന്നതാേടെ ജപ്പാനിലെ നിക്കെെ സൂചിക ചെറിയ നഷ്ടത്തിലേക്കു മാറി. കൊറിയൻ സൂചിക ഒരു ശതമാനം ഉയർന്നു.

ചൈനീസ് വിപണി ഇന്നു തിരിച്ചുവരവിലാണ്. ഷാങ്ഹായി സൂചിക മുക്കാൽ ശതമാനം ഉയർന്നു വ്യാപാരം തുടങ്ങി. ഹോങ് കോങ്ങിലെ ഹാങ് സെങ് രാവിലെ 1.75% കുതിച്ചു. ചൈനയുടെ ഒക്ടോബറിലെ ഫാക്ടറി ഉൽപാദനവും സേവന മേഖലയും ക്ഷീണത്തിലായി എന്ന് പിഎംഐ സർവേ കാണിച്ചു. വളർച്ചയ്ക്കു പകരം ഉൽപാദനക്കുറവാണ് സംഭവിച്ചത്.

രണ്ടു സൂചികകളും 50-നു താഴെയായി. വളർച്ച ഉണ്ടെങ്കിൽ 50-നു മുകളിൽ സൂചിക എത്തുമായിരുന്നു. കൂടുതൽ പ്രദേശങ്ങളിൽ കോവിഡ് നിയന്ത്രണം ഏർപ്പെടുത്തിയ ചൈനീസ് നടപടി വളർച്ചയ്ക്കു വീണ്ടും തടസമാകും.

തിങ്കളാഴ്ച ഇന്ത്യൻ വിപണി നേട്ടത്തോടെ തുടങ്ങിയിട്ടു ക്രമമായി കയറി ആവേശകരമായ നിലയിൽ ക്ലാേസ് ചെയ്യുകയായിരുന്നു. സെൻസെക്സ് 786.74 പോയിൻ്റ് (1.31%) കുതിച്ച് 60,746.59 ലും നിഫ്റ്റി 225.4 പോയിൻ്റ് (1.27%) ഉയർന്ന് 18,012.2 ലും ക്ലോസ് ചെയ്തു. മിഡ് ക്യാപ് സൂചിക 1.38 ശതമാനം കുതിച്ചെങ്കിലും സ്മോൾ ക്യാപ് സൂചിക 0.13 ശതമാനം മാത്രമേ ഉയർന്നുള്ളൂ.

എല്ലാ വ്യവസായ മേഖലകളും ഇന്നലെ നേട്ടമുണ്ടാക്കി. ഐടി, ഓട്ടോ, ബാങ്കിംഗ്, ധനകാര്യം, ഫാർമ, കൺസ്യൂമർ ഡ്യുറബിൾസ്, ഓയിൽ -ഗ്യാസ് തുടങ്ങിയവ നല്ല മുന്നേറ്റം കാണിച്ചു.

വിപണി ബുളളിഷ് മനോഭാവത്തിലാണെന്നു നിക്ഷേപ വിദഗ്ധർ പറയുന്നു.18,100-18,350 മേഖലയിലേക്കാണു നിഫ്റ്റി പോകുന്നത് എന്നാണു വിലയിരുത്തൽ. നിഫ്റ്റിക്ക് 17,930-ലും 17,860-ലും സപ്പോർട്ട് ഉണ്ട്. ഉയരുമ്പോ,ൾ 18,100-ലും 18,150-ലും തടസങ്ങൾ ഉണ്ട്.

വിദേശ നിക്ഷേപകർ ഇന്നലെ 4178.61 കോടി രൂപയുടെ ഓഹരികൾ ക്യാഷ് വിപണിയിൽ വാങ്ങി. കുറേ ആഴ്ചകൾക്കു ശേഷമാണു വിദേശികൾ ഈ തോതിൽ ഓഹരികൾ വാങ്ങുന്നത്. സ്വദേശി ഫണ്ടുകൾ 1107.1 കോടിയുടെ ഓഹരികൾ വിറ്റു.