വിലക്കയറ്റവും ഐ.ടിയിലെ ക്ഷീണവും നിർണായകം; ക്രൂഡ് ഓയിൽ വീണ്ടും മുകളിലേക്ക്; വിപണിയിലെ അനിശ്ചിതത്വം അകലുമോ?

ഐ.ടി മേഖലയുടെ ക്ഷീണം സ്ഥിരീകരിച്ചതും യു.എസ് ചില്ലറ വിലക്കയറ്റം കൂടിയതും ഇന്ന് ഇന്ത്യൻ വിപണിയുടെ ഗതിയെ സ്വാധീനിക്കും. കഴിഞ്ഞ ദിവസങ്ങളിൽ തുടർന്ന അനിശ്ചിതത്വം മാറ്റാൻ ഇന്നു വിപണിക്കു കഴിയുമാേ എന്നാണ് എല്ലാവരും ഉറ്റു നോക്കുന്നത്. 

ഡിസംബറിലവസാനിച്ച പാദത്തിലെ റിസൽട്ട് പ്രധാന ഐ.ടി കമ്പനികളായ ടി.സി.എസും ഇൻഫോസിസും ഇന്നലെ പ്രസിദ്ധീകരിച്ചത് പ്രതീക്ഷ പോലെ നിരാശാജനകമായി. ഐടി മേഖല പെട്ടെന്നു തിരിച്ചു കയറുമെന്ന സൂചന രണ്ടു കമ്പനികളും നൽകുന്നില്ല. വിപ്രോയും എച്ച്.സി.എലും ഇന്നു റിസൽട്ട് പുറത്തുവിടും. ഇന്നു വൈകുന്നേരം 5.30 നാണു ഡിസംബറിലെ ചില്ലറ വിലക്കയറ്റം, നവംബറിലെ വ്യവസായ ഉൽപാദന സൂചിക എന്നിവ പുറത്തുവിടുന്നത്. വിലക്കയറ്റം വർധിക്കുകയും വ്യവസായ വളർച്ച കുറയുകയും ചെയ്യുമെന്നാണ് നിഗമനം. 

വ്യാഴാഴ്ച രാത്രി ഡെറിവേറ്റീവ് വ്യാപാരത്തിൽ ഗിഫ്റ്റ് നിഫ്റ്റി 21,715 ൽ ക്ലോസ് ചെയ്തു. ഇന്നു രാവിലെ സൂചിക 21,725 വരെ കയറി. ഇന്ത്യൻ വിപണി അൽപം ഉയർന്നു വ്യാപാരം തുടങ്ങും എന്നാണു ഡെറിവേറ്റീവ് വിപണി നൽകുന്ന സൂചന.

ഡിസംബറിലെ യു.എസ് ചില്ലറ വിലക്കയറ്റം പ്രതീക്ഷയേക്കാൾ അൽപം കൂടുതലായത് ഇന്നലെ പാശ്ചാത്യ വിപണികളെ ഉലച്ചു. വിലക്കയറ്റം മാസക്കണക്കിൽ 0.3 ശതമാനവും വർഷക്കണക്കിൽ 3.4 ശതമാനവും കൂടി. 3.2 ശതമാനം വിലക്കയറ്റമാണു പ്രതീക്ഷിച്ചത്. നവംബറിൽ 3.1 ശതമാനമായിരുന്നു.

ഫെഡറൽ റിസർവ് പലിശനിരക്ക് നിശ്ചയിക്കുന്നതിന് ആധാരമാക്കുന്ന ഘടകങ്ങളിൽ ഒന്നാണ് ഇത്. ഇതു വർധിച്ചത് മാർച്ചിൽ പലിശ കുറയ്ക്കാനുള്ള സാധ്യത കുറയ്ക്കും എന്ന നിഗമനത്തിൽ ഓഹരികൾ ആദ്യം ഇടിഞ്ഞു. കടപ്പത്ര വില കുറഞ്ഞു, സ്വർണം കയറി. പിന്നീടു കൂടുതൽ വിശകലനങ്ങൾ വന്നപ്പാേൾ ഓഹരികൾ തിരിച്ചു കയറി, കടപ്പത്രങ്ങൾ കയറി, സ്വർണം താണു.

യു.എസ് വിലക്കയറ്റം ഉയർന്നതു വ്യാഴാഴ്ച യൂറോപ്യൻ വിപണികളെ ഒരു ശതമാനത്തോളം ഇടിവിലാക്കി. ബാങ്ക് ഓഹരികൾക്കാണു കൂടുതൽ തകർച്ച. 

യു.എസ് വിപണി വ്യാഴാഴ്ച വലിയ ചാഞ്ചാട്ടത്തിനു ശേഷം കാര്യമായ നഷ്ടമോ നേട്ടമോ ഇല്ലാതെ അവസാനിച്ചു. വിപണി തുറക്കും മുമ്പ് വന്ന വിലക്കയറ്റ കണക്ക് ആദ്യം വിപണിയെ താഴ്ത്തി. പിന്നീടു തിരിച്ചു കയറ്റി. ഡൗ ജോൺസ് സൂചിക 37,404 നും 37,802 നുമിടയിൽ ഇറങ്ങിക്കയറി. മറ്റു പ്രധാന സൂചികകളും ഇതേ വഴിയിലായിരുന്നു. ഡൗ ജോൺസ് 15.29 പോയിന്റ് (0.04%) ഉയർന്ന് 37,711.02 ൽ ക്ലോസ് ചെയ്തപ്പോൾ എസ് ആൻഡ് പി 3.21 പോയിന്റ് (0.07%) കാഴ്ന്ന് 4780.24 ൽ അവസാനിച്ചു. നാസ്ഡാക് നാമമാത്രമായ 0.54 പോയിന്റ് (0.00%) ഉയർന്ന് 14,970.18 ൽ ക്ലോസ് ചെയ്തു. 

ഏറ്റവും മൂല്യമുള്ള  കമ്പനി എന്ന പദവി ആപ്പിളിന് നഷ്ടമായി. മൈക്രോസോഫ്റ്റ് ആ പദവി വീണ്ടെടുത്തു. ഏതാനും ദിവസങ്ങളായി താഴുകയായിരുന്ന ആപ്പിളിന്റെ വിപണിമൂല്യം ഇന്നലെ 2.871 ലക്ഷം കോടി ഡോളറിലേക്കു താണു. നിർമിതബുദ്ധി ഉൽപന്നങ്ങളും സേവനങ്ങളും ദ്രുതഗതിയിൽ വിപണിയിലിറക്കിയ മൈക്രോസോഫ്റ്റിന്റെ വിപണിമൂല്യം 2.875 ലക്ഷം കോടി ഡോളർ ആയി.

യു.എസ് ഫ്യൂച്ചേഴ്സ് ഇന്നു രാവിലെ ചെറിയ താഴ്ചയിലാണ്. ഡൗ 0.04 ഉം എസ് ആൻഡ് പി 0.10 ഉം നാസ്ഡാക് 0.08 ഉം ശതമാനം താഴ്ന്നു നിൽക്കുന്നു. യു.എസ് 10 വർഷ കടപ്പത്രത്തിലെ നിക്ഷേപ നേട്ടം 3.975 ശതമാനമായി താഴ്ന്നു.

ജപ്പാനിൽ ഒഴികെ ഏഷ്യൻ വിപണികൾ ഇന്ന് താഴ്ചയിലാണു വ്യാപാരം തുടങ്ങിയത്. ജാപ്പനീസ് നിക്കൈ സൂചിക തുടക്കത്തിൽ രണ്ടു ശതമാനം കയറി. പിന്നീടു നേട്ടം കുറച്ചു.1990-നു ശേഷമുള്ള ഏറ്റവും ഉയർന്ന നിലയിൽ ആണു നിക്കെെയും ടോപ്പിക്സും. ഓസ്ട്രേലിയൻ, കൊറിയൻ വിപണികൾ താഴ്ന്നു. ചെെനീസ് വിപണികൾ ഇന്നു നേട്ടത്തിലാണു വ്യാപാരം തുടങ്ങിയത്.

ഇന്ത്യൻ വിപണി 

വ്യാഴാഴ്ച ഇന്ത്യൻ വിപണി ഉയർന്നു വ്യാപാരം തുടങ്ങി.പിന്നീടു ചാഞ്ചാടി. ഉച്ചയ്ക്കു ശേഷം വിപണി കുത്തനേ താണിട്ടു തിരിച്ചു കയറി. സെൻസെക്സ് 71,999 വരെ കയറിയിട്ട് 71,543 വരെയും നിഫ്റ്റി 21,726.5 വരെ കയറിയ ശേഷം 21,593 വരെയും താഴ്ന്നിട്ടാണു ചെറിയ നേട്ടത്തിൽ ക്ലോസ് ചെയ്തത്.

സെൻസെക്സ് 63.47 പോയിന്റ് (0.09%) ഉയർന്ന് 71,721.18 ലും നിഫ്റ്റി 28.5 പോയിന്റ് (0.13%) കയറി 21,647.20 ലും വ്യാപാരം അവസാനിപ്പിച്ചു. ബാങ്ക് നിഫ്റ്റി 77.5 പോയിന്റ് (0.16%) ഉയർന്ന് 47,438.35 ൽ ക്ലോസ് ചെയ്തു.