ഒന്നരലക്ഷം കോടിയല്ല, സീറോദയുടെ മൂല്യം ₹30,000 കോടിയെന്ന് നിതിന്‍ കാമത്ത്
2022-23 സാമ്പത്തിക വര്‍ഷത്തില്‍ കമ്പനിയുടെ വരുമാനം 6,875 കോടി രൂപ, വരുമാനത്തിന്റെ 42 ശതമാനവും ലാഭം
രാജ്യത്തെ ഏറ്റവും വലിയ സ്റ്റോക്ക് ബ്രോക്കിംഗ് സ്ഥാപനമായ സീറോദയുടെ പ്രവര്‍ത്തനഫല റിപ്പോര്‍ട്ട് പുറത്തുവന്നതിനു പിന്നാലെ കമ്പനിയുടെ വാല്വേഷനെ കുറിച്ചുള്ള ചര്‍ച്ചകളായിരുന്നു സാമൂഹ്യമാധ്യമങ്ങളില്‍. ഒരു ലക്ഷം കോടിയും രണ്ട് ലക്ഷം കോടി രൂപയുമൊക്കെയാണ് നെറ്റിസണ്‍സ് സീറോദയ്ക്ക് വാല്വേഷന്‍ നല്‍കിയത്.
''ഓഹരി വിപണി എപ്പോഴും നഷ്ടസാധ്യതകള്‍ക്ക് വിധേയമാണ്. വിപണിയില്‍ കുതിപ്പുണ്ടാകുമ്പോള്‍ ഈ നേട്ടം തുടരുമെന്ന തോന്നല്‍ പലര്‍ക്കുമുണ്ടാകും. കൂടുതല്‍ നിക്ഷേപകര്‍ വിപണിയിലേക്കെത്തും. പക്ഷേ, വിപണിയില്‍ പെട്ടെന്നൊരു ഇടിവുണ്ടായാല്‍ വരുമാനത്തിലും ഇടപാടുകളിലും 50 ശതമാനം വരെ ഇടിവുണ്ടാകും. ഇതില്‍ നമുക്കൊന്നും ചെയ്യാനാകില്ല. എന്തിന് സെബിയുടെ ഒരു സര്‍ക്കുലര്‍ പോലും വരുമാനം 50 ശതമാനം താഴേക്ക് കൊണ്ടു പോകും''.- എന്നാണ് സെറോദയ്ക്ക് താഴ്ന്ന വാല്വേഷന്‍ നല്‍കുന്നതിന്റെ കാരണമായി നിതിന്‍ കാമത്ത് പറയുന്നത്.
നിലവിലെ സാഹചര്യങ്ങൾ അനുസരിച്ച് 10-15 ശതമാനം നിരക്കില്‍ ദീര്‍ഘകാല വളര്‍ച്ചയാണ് കമ്പനി പ്രതീക്ഷിക്കുന്നതെന്നും നിതിന്‍ വ്യക്തമാക്കി.