പേഴ്സണല്‍ ലോണ്‍: ആരൊക്കെയാണ് ലോണ്‍ നേടാന്‍ അര്‍ഹരായിട്ടുളളവര്‍; യോഗ്യതകളും മാനദണ്ഡങ്ങളും ഇവയാണ്
നിങ്ങൾക്ക് നല്‍കുന്ന തുക പലിശയ്ക്കൊപ്പം തിരികെ ലഭിക്കുമെന്ന് ഉറപ്പാക്കാനാണ് ബാങ്കുകള്‍ മാനദണ്ഡങ്ങള്‍ നിശ്ചയിച്ചിട്ടുളളത്
Image Courtesy: Canva
പേഴ്സണല്‍ ലോണ്‍ ലഭിക്കുക എന്നത് അൽപ്പം ബുദ്ധിമുട്ടുള്ള കാര്യമാണ്. ബാങ്കുകളും ധനകാര്യ സ്ഥാപനങ്ങളും വ്യക്തിഗത വായ്പ അംഗീകരിക്കാന്‍ ഒട്ടേറെ മാനദണ്ഡങ്ങളാണ് ശ്രദ്ധിക്കാറുളളത്. എന്നാല്‍ വിവിധ ആവശ്യങ്ങൾക്കായി പണം കടം വാങ്ങുന്നതിനുള്ള ഒരു ജനപ്രിയ മാർഗമായി മാറിയിട്ടുണ്ട് ഇപ്പോള്‍ വ്യക്തിഗത വായ്പകൾ.
നിങ്ങൾക്ക് നല്‍കുന്ന തുക പലിശയ്ക്കൊപ്പം തിരികെ ലഭിക്കുമെന്ന് ഉറപ്പാക്കാനാണ് ബാങ്കുകള്‍ മാനദണ്ഡങ്ങള്‍ നിശ്ചയിച്ചിട്ടുളളത്. അതിനാല്‍ ലോണിന് അപേക്ഷിക്കുന്നവര്‍ ഈ മാനദണ്ഡങ്ങൾ മനസ്സിലാക്കുന്നത് നിങ്ങളുടെ ലോൺ അപേക്ഷയ്ക്ക് അംഗീകാരം ലഭിക്കുമോ എന്ന് അറിയാന്‍ വളരെ സഹായകരമാണ്.
യോഗ്യതകള്‍
വരുമാനം: പ്രതിമാസം കുറഞ്ഞത് 15,000 രൂപയെങ്കിലും സമ്പാദ്യമായി ലോണിന് അപേക്ഷിക്കുന്നവര്‍ക്ക് ഉണ്ടാകേണ്ടതുണ്ട്.
ജോലി: മിക്ക ബാങ്കുകളും നിലവിലെ ജോലിയില്‍ ഒന്നോ രണ്ടോ വർഷം പൂര്‍ത്തിയാക്കിയവര്‍ക്ക് ലോണ്‍ കൊടുക്കാനാണ് താല്‍പ്പര്യപ്പെടുന്നത്.
പ്രായം: സാധാരണയായി 18 നും 60 നും ഇടയില്‍ വയസുളളവര്‍ക്കാണ് ലോണ്‍ അനുവദിക്കാറുളളത്.
ക്രെഡിറ്റ് സ്കോർ: 700+ ക്രെഡിറ്റ് സ്കോര്‍ ഉണ്ടായിരിക്കേണ്ടത് അഭിലഷണീയമാണ്.
പരിധി: നിങ്ങളുടെ വായ്പാ പേയ്‌മെന്റുകൾ നിങ്ങളുടെ വരുമാനത്തിന്റെ പകുതിയിൽ കൂടുതൽ ആയിരിക്കരുത്.
രേഖകൾ: നിങ്ങൾക്ക് സര്‍ക്കാര്‍ അംഗീകൃത ഐ.ഡി കാര്‍ഡുകള്‍ (ആധാര്‍, പാന്‍ കാര്‍ഡ് തുടങ്ങിയവ), മേല്‍വിലാസം തെളിയിക്കുന്ന രേഖകള്‍, സാലറി സ്ലിപ്പുകൾ തുടങ്ങിയവ ആവശ്യമാണ്.
ലോൺ യോഗ്യതയെ ബാധിക്കുന്ന പ്രധാന ഘടകങ്ങൾ
വരുമാനവും തൊഴിലും: ബാങ്കുകള്‍ വായ്പ നല്‍കുന്നതിന് മുമ്പായി ശ്രദ്ധിക്കുന്ന പ്രധാന കാര്യമാണ് നിങ്ങളുടെ വരുമാനം. വായ്പ തിരിച്ചടയ്ക്കാൻ നിങ്ങൾക്ക് മതിയായ വരുമാനമുണ്ടോ എന്ന് ധനകാര്യ സ്ഥാപനങ്ങള്‍ നിര്‍ബന്ധമായും പരിശോധിക്കും. നിങ്ങള്‍ കമ്പനികളില്‍ ജോലി ചെയ്യുന്നവരാണെങ്കില്‍ കുറഞ്ഞ ശമ്പളം നിങ്ങൾക്ക് പ്രതിമാസം 15,000 രൂപയെങ്കിലും ഉണ്ടാകേണ്ടതുണ്ട്. സ്വയം തൊഴിൽ ചെയ്യുന്നവർക്ക് സാധാരണയായി 2 ലക്ഷം രൂപയോ അതിൽ കൂടുതലോ വാർഷിക വരുമാനം ഉണ്ടായിരിക്കണം.
ക്രെഡിറ്റ് സ്കോർ: നിങ്ങളുടെ ക്രെഡിറ്റ് സ്കോർ നിങ്ങളുടെ പണം എത്ര നന്നായി കൈകാര്യം ചെയ്യുന്നു എന്നതിന്റെ തെളിവായിട്ടാണ് ബാങ്കുകള്‍ പരിഗണിക്കുന്നത്. ഇത് 300 നും 900 നും ഇടയിലായിരിക്കാന്‍ ശ്രദ്ധിക്കേണ്ടതാണ്. നിങ്ങളുടെ ക്രെഡിറ്റ് സ്കോർ കൂടുന്തോറും പേഴ്‌സണൽ ലോണിന് യോഗ്യത നേടാനുള്ള സാധ്യതയും വര്‍ധിക്കുന്നു.ഭൂരിഭാഗം ബാങ്കുകളും കുറഞ്ഞത് 700 ക്രെഡിറ്റ് സ്കോറെങ്കിലും ഉണ്ടാകാന്‍ നിഷ്കര്‍ഷിക്കാറുണ്ട്. ലോണുകളും ക്രെഡിറ്റ് കാർഡുകളും കൈകാര്യം ചെയ്യുമ്പോൾ നിങ്ങൾ ഉത്തരവാദിത്തം പുലര്‍ത്തുന്നതായി നല്ല ക്രെഡിറ്റ് സ്കോർ സൂചിപ്പിക്കുന്നു.
ചുരുക്കത്തില്‍ നിങ്ങളുടെ വരുമാനം, ക്രെഡിറ്റ് സ്കോർ റേറ്റിംഗ്, അടിസ്ഥാന സാമ്പത്തിക ശേഷി തുടങ്ങിയവയിൽ ശ്രദ്ധ കേന്ദ്രീകരിക്കുന്നതിലൂടെ, നിങ്ങൾക്ക് വ്യക്തിഗത വായ്പയ്ക്ക് അർഹത നേടാനുള്ള സാധ്യതകൾ കൂടുതലാണ്.