കുറഞ്ഞ വിലയില്‍ കൂടുതല്‍ മെച്ചം: 'ജിയോഫോണ്‍ നെക്സ്റ്റ്' പുറത്തിറക്കും, റിലയന്‍സ് എജിഎമ്മിലെ പ്രഖ്യാപനങ്ങള്‍ അറിയാം
44 ാമത് ആന്വല്‍ ജനറല്‍ മീറ്റിലാണ് മുകേഷ് അംബാനിയുടെ വമ്പന്‍ പ്രഖ്യാപനങ്ങള്‍
44 ാമത് ആന്വല്‍ ജനറല്‍ മീറ്റില്‍ വമ്പന്‍ പ്രഖ്യാപനങ്ങളുമായി റിലയന്‍സ് ഇന്‍ഡസ്ട്രീസ്. ഏവരും പ്രതീക്ഷയോടെ കാത്തിരിക്കുന്ന ജിയോഫോണ്‍ നെക്സ്റ്റ് സെപ്റ്റംബര്‍ 10ന് പുറത്തിറക്കുമെന്നതടക്കമുള്ള തങ്ങളുടെ ബിസിനസ് വിപുലീകരണ - നിക്ഷേപ പദ്ധതികളുമാണ് മുകേഷ് അംബാനി എജിഎമ്മില്‍ പ്രഖ്യാപിച്ചത്. റിലയന്‍സിന്റെ അന്താരാഷ്ട്രതലത്തിലേക്കുള്ള ചുവടുവയ്പ്പിന്റെ പ്രഖ്യാപനത്തിന് കൂടിയാണ് 44 ാമത് എജിഎം വേദിയായത്.
പ്രഖ്യാപനങ്ങള്‍ ഇങ്ങനെ
* സൗദി അരംകോ ചെയര്‍മാനും പബ്ലിക് ഇന്‍വെസ്റ്റ്‌മെന്റ് ഫണ്ട് ഗവര്‍ണറുമായ യാസിര്‍ അല്‍-റുമയ്യാനെ റിലയന്‍സ് ബോര്‍ഡില്‍ സ്വതന്ത്ര ഡയറക്ടറായി ഉള്‍പ്പെടുത്തി. റിലയന്‍സും അരംകോയുമായുള്ള കരാര്‍ ഈ വര്‍ഷത്തോടെ യാഥാര്‍ത്ഥ്യമാകുമെന്നാണ് പ്രതീക്ഷിക്കുന്നത്. ഇതിനുമുന്നോടിയാണ് ഈ തീരുമാനം. സൗദി അരംകോയുമായുള്ള കരാറിലൂടെ അന്താരാഷ്ട്ര തലത്തിലേക്കുള്ള വലിയൊരു ചുവടുവയ്പ്പിനാണ് റിലയന്‍സ് ഒരുങ്ങുന്നത്. ''റിലയന്‍സിന്റെ അന്താരാഷ്ട്രവല്‍ക്കരണത്തിന്റെ തുടക്കമാണിത്, വരും കാലങ്ങളില്‍ ഞങ്ങളുടെ അന്താരാഷ്ട്ര പദ്ധതികളെക്കുറിച്ച് നിങ്ങള്‍ കൂടുതല്‍ കേള്‍ക്കും,'' അംബാനി പറഞ്ഞു.
* ഇന്ത്യയില്‍ ഡിജിറ്റലൈസേഷന് അടിത്തറ പാകുന്നതിന് 5 ജി ഗൂഗ്ള്‍ ഐക്ലൗഡും ജിയോയും സംയുക്തമായി പ്രവര്‍ത്തിക്കും. ഇതിന്റെ ഭാഗമായി ഗൂഗ്ള്‍ ഐക്ലൗഡിന്റെ സാങ്കേതികവിദ്യ ജിയോ ഉപയോഗിക്കും. ജിയോ ഇന്ത്യയെ '2 ജി-മുക്ത് മാത്രമല്ല, 5 ജി-യുക്ത്' ആക്കാനും ശ്രമിക്കുകയാണെന്ന് മുകേഷ് അംബാനി പറയുന്നു. ഇന്ത്യയില്‍ ആദ്യമായി 5 ജി സേവനം ആരംഭിക്കുന്നതില്‍ തനിക്ക് വിശ്വാസമുണ്ടെന്നും അംബാനി പറഞ്ഞു.
* ഗൂഗ്‌ളും ജിയോയും സംയുക്തമായുള്ള ജിയോഫോണ്‍ നെക്സ്റ്റ് സെപ്റ്റംബര്‍ 10ന് പുറത്തിറക്കും. പൂര്‍ണമായും ആന്‍ഡ്രോയ്ഡ് സവിശേഷതയുള്ള ജിയോഫോണ്‍ നെക്സ്റ്റ് ഏവര്‍ക്കും താങ്ങാവുന്നതാണെന്ന് അംബാനി പറഞ്ഞു. അതിനാല്‍ ജിയോഫോണ്‍ നെക്‌സ്റ്റിന് വലിയ വില വേണ്ടി വരില്ലെന്ന് പ്രതീക്ഷിക്കാം.
* ഊര്‍ജ വ്യവസായ രംഗത്ത് ബിസിനസ് വിപുലീകരണത്തിന്റെ ഭാഗമായി ധീരുഭായ് അംബാന്‍ ഗ്രീന്‍ എനര്‍ജി ഗിഗാ കോംപ്ലക്‌സ് സൃഷ്ടിക്കും. ഇതിന്റെ പ്രാരംഭ നിക്ഷേപം 75,000 കോടി രൂപയായിരിക്കും.
* റിലയന്‍സ് റീട്ടെയില്‍ 6,000 പുതിയ തൊഴിലവസരങ്ങള്‍ സൃഷ്ടിച്ചുവെന്ന് അംബാനി പറഞ്ഞു. അടുത്ത 3-5 വര്‍ഷത്തിനുള്ളില്‍ കുറഞ്ഞത് മൂന്ന് മടങ്ങ് വളര്‍ച്ച കൈവരിക്കാനുള്ള ഉയര്‍ന്ന വളര്‍ച്ചാ പാതയിലാണ് റിലയന്‍സ് റീട്ടെയില്‍.