ആറ് മാസത്തിനിടെ 785 ശതമാനം നേട്ടം, വിപണിയില്‍ കുതിച്ചുപായുന്ന ഈ ഓഹരി അറിയുമോ?
ഭക്ഷ്യ സംസ്‌കരണ രംഗത്ത് പ്രവര്‍ത്തിക്കുന്ന കമ്പനി 60-ലധികം രാജ്യങ്ങളിലേക്ക് ഉല്‍പ്പന്നങ്ങള്‍ കയറ്റുമതി ചെയ്യുന്നുണ്ട്
ഓഹരി വിപണിയില്‍ അഭൂതപൂര്‍വ്വമായ നേട്ടങ്ങള്‍ സമ്മാനിക്കുന്ന കമ്പനികള്‍ വിരളമാണ്. എന്നാല്‍ കഴിഞ്ഞ ആറ് മാസമായി വിപണിയില്‍ കുതിച്ചുപായുന്നൊരു ഓഹരിയുണ്ട്. കോഹിനൂര്‍ ഫുഡ്സ് ലിമിറ്റഡ്. ആറ് മാസത്തിനിടെ ഓഹരി വിലയില്‍ 785 ശതമാനത്തിന്റെ നേട്ടവുമായി നിക്ഷേപകരെ അമ്പരപ്പിച്ചിരിക്കുകയാണ് ഭക്ഷ്യ സംസ്‌കരണ രംഗത്ത് പ്രവര്‍ത്തിക്കുന്ന കമ്പനി. ഏപ്രില്‍ 21ന് ശേഷം തുടര്‍ച്ചയായി അപ്പര്‍സര്‍ക്യൂട്ടില്‍ മുന്നേറുന്ന കോഹിനൂര്‍ ഫുഡ്സ് ഒരു മാസത്തിനിടെ 174 ശതമാനത്തിന്റെ നേട്ടമാണ് നിക്ഷേപകര്‍ക്ക് സമ്മാനിച്ചത്. ഇന്ന് (14-05-2022) അഞ്ച് ശതമാനം ഉയര്‍ച്ചയോടെ 68.60 രൂപ എന്ന നിലയിലാണ് കോഹിനൂര്‍ ഫുഡ്സ് ഓഹരി വിപണിയില്‍ വ്യാപാരം നടത്തുന്നത്. 52 ആഴ്ചക്കിടെയുള്ള ഏറ്റവും ഉയര്‍ന്ന നിലയും ഇതാണ്.