സ്വര്‍ണത്തില്‍ അനക്കമില്ലാത്ത ശനി! സിറിയന്‍ സംഘര്‍ഷം കയറ്റത്തിന് വഴിയൊരുക്കുമോ?

കേരളത്തില്‍ സ്വര്‍ണവിലയില്‍ ഇന്ന് മാറ്റമില്ലാത്ത ശനിയാഴ്ച. ഇന്നലത്തെ നിരക്കായ പവന് 56,920 രൂപയില്‍ തന്നെയാണ് ഇന്നും വ്യാപാരം നടക്കുന്നത്. ഗ്രാം വില 7,115 രൂപ. ലൈറ്റ് വെയിറ്റ് ആഭരണങ്ങള്‍ നിര്‍മിക്കാന്‍ ഉപയോഗിക്കുന്ന 18 കാരറ്റ് സ്വര്‍ണത്തിന് ഗ്രാമിന് 5,875 രൂപയാണ്. വെള്ളിവില ഒരു രൂപ കുറഞ്ഞ് 98ലെത്തി.

സിറിയയില്‍ വിമത സായുധസേനയ്‌ക്കൊപ്പവും എതിരായും രാജ്യങ്ങള്‍ നിലയുറപ്പിക്കുന്നത് മറ്റൊരു യുദ്ധത്തിന് കൂടി വഴിയൊരുക്കുമെന്ന ഭയം ലോകത്തിനുണ്ട്. ഇറാന്‍-ഇസ്രയേല്‍ സംഘര്‍ഷും റഷ്യ-ഉക്രെയ്ന്‍ യുദ്ധവും സ്വര്‍ണവിലയില്‍ വന്‍ വര്‍ധനയ്ക്ക് കാരണമായിരുന്നു.

കഴിഞ്ഞ മാസം ഇറാന്‍ ഇസ്രയേലിലേക്ക് മിസൈല്‍ ആക്രമണം നടത്തിയപ്പോള്‍ സ്വര്‍ണവില റെക്കോഡ് തലത്തിലേക്ക് ഉയര്‍ന്നിരുന്നു. സിറിയയില്‍ യുദ്ധത്തിന്റെ രീതി മാറിയാല്‍ സ്വര്‍ണത്തിലും അതു പ്രതിഫലിക്കുമെന്ന് ഉറപ്പാണ്.

മൂന്ന് ശതമാനം ജി.എസ്.ടി, ഹോള്‍മാര്‍ക്ക് ചാര്‍ജ് (45 രൂപ+18% ജി.എസ്.ടി), മിനിമം 5 ശതമാനം പണിക്കൂലി എന്നിവ ചേര്‍ത്താല്‍ ഇന്ന് നല്‍കേണ്ടത് ഒരു പവന്‍ ആഭരണത്തിന് 61,612 രൂപയാണ്. അതേസമയം, പല സ്വര്‍ണക്കടകളിലും ആഭരണത്തിന്റെ ഡിസൈനിന് ആനുപാതികമായി പണിക്കൂലി വ്യത്യസ്തമാണ്. ചില ആഭരണങ്ങള്‍ക്ക് ബ്രാന്‍ഡ് അനുസരിച്ച് പണക്കൂലി 20 ശതമാനത്തിനും മുകളിലായിരിക്കും.