നിങ്ങളുടെ ബിസിനസ് വളര്‍ത്താം, കൊച്ചി മെട്രോയ്‌ക്കൊപ്പം ചേര്‍ന്ന്
ഓഫീസ് തുറക്കാം, ബ്രാന്‍ഡിംഗ് നടത്താം തുടങ്ങി സംരംഭകര്‍ക്ക് പ്രയോജനപ്പെടുത്താവുന്ന പല കാര്യങ്ങളും ഉള്‍പ്പെടുത്തിയാണ് മെട്രോ മുന്നേറുന്നത്
കൊച്ചി നഗരത്തിന് ആധുനികതയുടെ മുഖം സമ്മാനിച്ച കൊച്ചി മെട്രോ കുതിപ്പിന്റെ ട്രാക്കിലാണ്. നടപ്പ് സാമ്പത്തിക വര്‍ഷത്തില്‍ 150-160 കോടി രൂപ വരുമാനമാണ് കൊച്ചി മെട്രോ റെയ്ല്‍ ലിമിറ്റഡ് ലക്ഷ്യമിടുന്നത്. വായ്പ തിരിച്ചടവും മറ്റും മാറ്റിനിര്‍ത്തിയാല്‍ ഈ വര്‍ഷം 15-20 കോടി രൂപ പ്രവര്‍ത്തന ലാഭം നേടാനാണ് ശ്രമിക്കുന്നതെന്ന് കൊച്ചി മെട്രോ റെയ്ല്‍ ലിമിറ്റഡ് മാനേജിംഗ് ഡയറക്റ്റര്‍ ലോക്നാഥ് ബെഹ്റ ധനത്തോട് പറഞ്ഞു. ''കഴിഞ്ഞ മൂന്ന് വര്‍ഷം മുമ്പ് 60 കോടി രൂപ നഷ്ടമായിരുന്നു. അതിന് ശേഷമുള്ള വര്‍ഷത്തില്‍ നഷ്ടം 34 കോടിയായി. കഴിഞ്ഞ വര്‍ഷം മൂന്ന് കോടി രൂപ പ്രവര്‍ത്തന ലാഭം നേടാനായി''- ലോക്നാഥ് ബെഹ്റ പറയുന്നു.
സ്ത്രീകള്‍ ഉള്‍പ്പെടെയുള്ള ചെറുതും വലുതുമായ സംരംഭകര്‍ക്കും കൊച്ചി മെട്രോ കൈത്താങ്ങാണ്. സമൂഹത്തിലെ എല്ലാ വിഭാഗം ജനങ്ങളെയും പ്രത്യേകിച്ച് വനിതകള്‍, ട്രാന്‍സ്ജെന്‍ഡേഴ്സ് എന്നിവരെയെല്ലാം ഉള്‍ക്കൊള്ളിച്ചുള്ള വികസന മാതൃകയാണ് കൊച്ചി മെട്രോ പിന്തുടരുന്നത്. ''വനിതകള്‍ക്ക് ഇ-ഓട്ടോറിക്ഷകള്‍ നല്‍കി പ്രതിദിനം 1,000 രൂപയോളം വരുമാനം ഉറപ്പാക്കാന്‍ പറ്റുന്ന വിധമാണ് മെട്രോ ഇപ്പോള്‍ പദ്ധതി ആവിഷ്‌ക്കരിച്ചിരിക്കുന്നത്. പക്ഷേ ആവശ്യത്തിന് അപേക്ഷകരെ കണ്ടെത്താനായിട്ടില്ല. മനുഷ്യവിഭവശേഷി സൂചികയില്‍ ഏറെ മുന്നില്‍ നില്‍ക്കുന്ന കേരളം ഇവിടുത്തെ സ്ത്രീ സമൂഹത്തിന് അവരുടെ അറിവും കഴിവും വൈദഗ്ധ്യവും പുറത്തെടുത്ത് മികച്ച ജീവിത നിലവാരം നേടിയെടുക്കാനുള്ള പിന്തുണ കുടുംബവും സമൂഹവും നല്‍കേണ്ടിയിരിക്കുന്നു''- ലോക്നാഥ് ബെഹ്റ ചൂണ്ടിക്കാട്ടുന്നു.