റിസര്‍വ് ബാങ്ക് തീരുമാനത്തില്‍ വിപണി വീണു, സെന്സെക്സ് 2.29 ശതമാനം താഴ്ന്നു
അഞ്ച് കേരള കമ്പനികള്‍ മാത്രമാണ് ഇന്ന് നേട്ടമുണ്ടാക്കിയത്
ഫെഡ് തീരുമാനത്തെ ഉറ്റുനോക്കിയ ഇന്ത്യന്‍ നിക്ഷേപകര്‍ക്ക് 'സര്‍പ്രൈസ്' നല്‍കിയ റിസര്‍വ് ബാങ്ക് തീരുമാനത്തില്‍ വിപണി വീണു. റിപ്പോ നിരക്ക് 4.40 ശതമാനമാക്കി ഉയര്‍ത്താനുള്ള ആര്‍ബിഐയുടെ പ്രഖ്യാപനം വന്നതിന് പിന്നാലെ വിപണി രക്തച്ചൊരിച്ചിലിന് സാക്ഷ്യം വഹിച്ചു. 50 ബിപിഎസ് നിരക്ക് വര്‍ധന പ്രതീക്ഷിക്കുന്ന യുഎസ് ഫെഡറല്‍ റിസര്‍വ് മീറ്റിംഗ് ഫലത്തിന്റെ പശ്ചാത്തലത്തില്‍ വിപണികള്‍ ഇതിനകം തന്നെ അനിശ്ചിതത്വത്തിലും ആശങ്കയിലുമാണ് മുന്നോട്ടുപോകുന്നത്. അതിനിടെയാണ് ആര്‍ബിഐയുടെ അപ്രതീക്ഷിത പ്രഖ്യാപനം.
ബെഞ്ച്മാര്‍ക്ക് സൂചിക സെന്സെക്സ് 1306 അഥവാ 2.26 ശതമാനം ഇടിഞ്ഞ് 55,669 പോയ്ന്റിലാണ് ഇന്ന് വ്യാപാരം അവസാനിപ്പിച്ചത്. നിഫ്റ്റി സൂചിക 2.29 ശതമാനം അഥവാ 391 പോയ്ന്റ് ഇടിഞ്ഞ് 16,677 പോയ്ന്റിലും ക്ലോസ് ചെയ്തു. ഇന്ത്യന്‍ ഓഹരി വിപണി ഏറെ പ്രതീക്ഷയോടെ കാത്തിരുന്ന എല്‍ഐസിയുടെ ഐപിഒ ഇന്ന് തുറന്നെങ്കിലും വിപണിക്ക് നേട്ടമായില്ല. ബാങ്കിംഗ്, എന്‍ബിഎഫ്‌സി, ഹൗസിംഗ് ഫിനാന്‍സ്, ഓട്ടോ, റിയല്‍ എസ്റ്റേറ്റ് തുടങ്ങിയ മേഖലകള്‍ കനത്ത നഷ്ടം രേഖപ്പെടുത്തി.
സെന്സെക്സ് ഓഹരികളില്‍, ടൈറ്റന്‍, ബജാജ് ഫിന്‍സെര്‍വ്, ബജാജ് ഫിനാന്‍സ് എന്നിവ നാല് ശതമാനം വീതം ഇടിഞ്ഞു. ഇന്‍ഡസ്ഇന്‍ഡ് ബാങ്ക്, എച്ച്ഡിഎഫ്‌സി ബാങ്ക്, റിലയന്‍സ് ഇന്‍ഡസ്ട്രീസ്, ഏഷ്യന്‍ പെയിന്റ്‌സ്, മാരുതി എന്നിവയാണ് മൂന്ന് ശതമാനത്തോളം നഷ്ടം നേരിട്ട മറ്റ് കമ്പനികള്‍. പവര്‍ഗ്രിഡ് കോര്‍പ്പറേഷനും എന്‍ടിപിസിയും നേട്ടത്തിലാണ് വ്യാപാരം അവസാനിപ്പിച്ചത്. കണ്‍സ്യൂമര്‍ ഡ്യൂറബിള്‍സ് സൂചിക നാല് ശതമാനത്തോളം ഇടിഞ്ഞു. ഹെല്‍ത്ത് കെയര്‍, ടെലികോം, ഓട്ടോ, ക്യാപിറ്റല്‍ ഗുഡ്‌സ്, മെറ്റല്‍, റിയാലിറ്റി സൂചികകളും 2-3 ശതമാനം വീതം ഇടിഞ്ഞു.
കേരള കമ്പനികളുടെ പ്രകടനം
വിപണി രക്തച്ചൊരിച്ചിലിന് സാക്ഷ്യം വഹിച്ച ഇന്ന് അഞ്ച് കേരള കമ്പനികള്‍ മാത്രമാണ് നേട്ടമുണ്ടാക്കിയത്. ഇന്‍ഡിട്രേഡ് (ജെആര്‍ജി) (0.32 ശതമാനം), കേരള ആയുര്‍വേദ (0.82 ശതമാനം), കിംഗ്‌സ് ഇന്‍ഫ്രാ വെഞ്ച്വേഴ്‌സ് (0.65 ശതമാനം), പാറ്റ്‌സ്പിന്‍ ഇന്ത്യ (0.61 ശതമാനം), വെര്‍ട്ടെക്‌സ് സെക്യൂരിറ്റീസ് (4.97 ശതമാനം) എന്നിവയാണ് ഇന്ന് വിപണിയില്‍ നേട്ടമുണ്ടാക്കിയ കേരള കമ്പനികള്‍. അതേസമയം ആസ്റ്റര്‍ ഡി എം, കൊച്ചിന്‍ മിനറല്‍സ് & റുട്ടൈല്‍, ഹാരിസണ്‍സ് മലയാളം, കിറ്റെക്‌സ്, കെഎസ്ഇ, സ്‌കൂബീ ഡേ ഗാര്‍മന്റ്‌സ്, വണ്ടര്‍ലാ ഹോളിഡേയ്‌സ് എന്നിവയുടെ ഓഹരിവില 2-5 ശതമാനം വരെ ഇടിഞ്ഞു. ഈസ്റ്റേണ്‍ ട്രെഡ്‌സിന്റെ ഓഹരി വിലയില്‍ മാറ്റമുണ്ടായില്ല.