ബോണസ് ഓഹരികള്‍ നല്‍കാന്‍ റിലയന്‍സ്, 1.7 ലക്ഷം പുതിയ തൊഴില്‍; നേട്ടങ്ങള്‍ക്ക് അക്കമിട്ട് മുകേഷ് അംബാനി
ജിയോ എ.ഐ ക്ലൗഡ് വെല്‍ക്കം ഓഫര്‍ അവതരിപ്പിച്ചു, ഇന്ത്യയ്ക്ക് പുറത്ത് കൂടുതല്‍ സ്റ്റോറുകള്‍ തുറക്കും
Image Credit: youtube.com/@cnnnews18
കഴിഞ്ഞ സാമ്പത്തികവര്‍ഷം സ്വന്തമാക്കിയ നേട്ടങ്ങള്‍ ഒന്നൊന്നായി എണ്ണിപ്പറഞ്ഞും ഭാവി പദ്ധതികളെപ്പറ്റി വിശദീകരിച്ചും പിന്തുടര്‍ച്ചക്കാരുടെ മികവിനെ വാഴ്ത്തിയും റിലയന്‍സ് ഇന്‍ഡസ്ട്രീസിന്റെ വാര്‍ഷിക 47മത് പൊതുയോഗത്തില്‍ ചെയര്‍മാന്‍ മുകേഷ് അംബാനിയുടെ പ്രസംഗം. എ.ഐ അധിഷ്ടിത സാങ്കേതിക വിദ്യയില്‍ കൂടുതല്‍ നിക്ഷേപം നടത്തുമെന്നും ഈ പതിറ്റാണ്ടിന്റെ അവസാനത്തോടെ ഇരട്ടി വളര്‍ച്ച നേടുകയാണ് ലക്ഷ്യമെന്നും അദ്ദേഹം വ്യക്തമാക്കി.
മുകേഷ് അംബാനിയുടെ പ്രഖ്യാപനങ്ങള്‍
♦ 2025 ഓടെ ജാംനഗര്‍ റിലയന്‍സിന്റെ ന്യു എനര്‍ജി ബിസിനസിന്റെ ഹബ്ബായി മാറും. ധീരുഭായ് അംബാനി ഗ്രീന്‍ എനര്‍ജി ഗിഗാ മാനുഫാക്ചറിംഗ് കോംപ്ലക്‌സ് ലോകത്തിലെ തന്നെ ഏറ്റവും വലുതും ആധുനികവുമായ കേന്ദ്രമായി മാറും. അതിനൊപ്പം എ.ഐ, മെഷീന്‍ ലേണിംഗ്, റോബോട്ടിക്‌സ് എന്നിവയുള്‍പ്പെടെ വിപുലമായ സെന്ററിനായി 75,000 കോടി രൂപയാണ് നിക്ഷേപിക്കുക.