കൂടുതല്‍ ഇന്ത്യക്കാരും സഞ്ചരിക്കുന്ന രാജ്യങ്ങളിലേക്ക് റോമിംഗ് പ്ലാനുകളുമായി ജിയോ; രാജ്യങ്ങളും നിരക്കും അറിയാം
സന്ദർശിക്കുന്ന രാജ്യത്തിനുള്ളില്‍ ലോക്കൽ കോളുകളും ഇന്ത്യയിലേക്കുള്ള കോളുകളും അടങ്ങുന്ന ഔട്ട്‌ഗോയിംഗ് കോളുകൾ, അൺലിമിറ്റഡ് ഇൻകമിംഗ് എസ്.എം.എസ് തുടങ്ങിയവ സവിശേഷതകളാണ്
Image Courtesy: Canva
സ്വകാര്യ ടെലികോം കമ്പനികള്‍ തമ്മിലുളള മത്സരം മുറുകിയതോടെ ആകര്‍ഷകമായ പല ഡാറ്റാ, കോള്‍ പാക്കുകളുമായി എത്തുകയാണ് മിക്കവരും. ഇന്ത്യക്ക് പുറത്ത് യാത്ര ചെയ്യുന്നവരോ, വിനോദ സഞ്ചാരത്തിന് പോകുന്നവരോ ആയവര്‍ക്ക് സൗകര്യപ്രദമായ പ്ലാനുകളുമായി എത്തിയിരിക്കുകയാണ് റിലയന്‍സ് ജിയോ.
അൺലിമിറ്റഡ് ഇൻകമിംഗ് എസ്.എം.എസ്, സന്ദർശിക്കുന്ന രാജ്യത്തിനുള്ളില്‍ ലോക്കൽ കോളുകളും ഇന്ത്യയിലേക്കുള്ള കോളുകളും അടങ്ങുന്ന ഔട്ട്‌ഗോയിംഗ് കോളുകൾ തുടങ്ങിയ സവിശേഷതകളാണ് പാക്കുകള്‍ വാഗ്ദാനം ചെയ്യുന്നത്. കൂടാതെ ഏത് രാജ്യത്തുനിന്നും ഇൻകമിംഗ് വൈഫൈ കോളുകളും സ്വീകരിക്കാന്‍ സാധിക്കും.
റോമിംഗ് പ്ലാനുകള്‍ ഉളള രാജ്യങ്ങള്‍
ഇന്ത്യക്കാര്‍ കൂടുതലായി സഞ്ചരിക്കുന്ന രാജ്യങ്ങളിലേക്കാണ് റോമിംഗ് പ്ലാനുകള്‍ കമ്പനി അവതരിപ്പിച്ചിരിക്കുന്നത്. യു.എ.ഇ, കാനഡ, തായ്‌ലൻഡ്, സൗദി അറേബ്യ, യൂറോപ്പിലെയും കരീബിയൻ ദ്വീപുകളിലെയും രാജ്യങ്ങൾ തുടങ്ങിയ സ്ഥലങ്ങളിലേക്കുളള പ്ലാനുകളാണ് അവതരിപ്പിച്ചിട്ടുളളത്. കരീബിയൻ ദ്വീപുകളിലെ 24 രാജ്യങ്ങളിലും യൂറോപ്പിലെ 32 രാജ്യങ്ങളിലും റോമിംഗ് പാക്ക് ലഭ്യമാണ്.
യുഎഇയിലേക്ക് യാത്ര ചെയ്യുന്നവർക്ക് മൂന്ന് പ്ലാനുകളാണ് ജിയോ നൽകുന്നത്. 898 രൂപയുടെ പാക്കില്‍ 100 മിനിറ്റ് ഔട്ട്‌ഗോയിംഗ് കോളുകൾ (ലോക്കൽ, ഇന്ത്യയിലേക്കുള്ള കോളുകൾ), 100 മിനിറ്റ് ഇൻകമിംഗ് കോളുകൾ, 1 ജിബി ഡാറ്റ, 100 എസ്.എം.എസ് എന്നിവ 7 ദിവസത്തെ വാലിഡിറ്റി കാലയളവിൽ വാഗ്ദാനം ചെയ്യുന്നു.
150 മിനിറ്റ് ഔട്ട്‌ഗോയിംഗ്, ഇൻകമിംഗ് കോളുകൾ, 3 ജിബി ഡാറ്റ, 14 ദിവസത്തെ വാലിഡിറ്റി എന്നിവയുള്ള 1,598 രൂപയുടെ പാക്കും കമ്പനി അവതരിപ്പിച്ചിട്ടുണ്ട്. 250 മിനിറ്റ് ഔട്ട്‌ഗോയിംഗ്, ഇൻകമിംഗ് കോളുകൾ, 7 ജിബി ഡാറ്റ, 21 ദിവസത്തെ വാലിഡിറ്റി എന്നിവ വാഗ്ദാനം ചെയ്യുന്ന പാക്ക് 2,998 രൂപ നിരക്കിലാണ് അവതരിപ്പിച്ചിരിക്കുന്നത്.
സൗദി അറേബ്യ റോമിംഗ് പ്ലാനില്‍ 100 മിനിറ്റ് കോളുകൾ, 1 ജിബി ഡാറ്റ, 20 എസ്.എം.എസ്, 7 ദിവസത്തെ വാലിഡിറ്റി തുടങ്ങിയവ വാഗ്ദാനം ചെയ്യുന്ന പ്ലാനിന് 891 രൂപയാണ് നിരക്ക്. കൂടാതെ 150 മിനിറ്റ് കോളുകളും 5 ജിബി ഡാറ്റയും നല്‍കുന്ന 2,891 രൂപയുടെ പ്ലാനും ഉണ്ട്.
കാനഡ റോമിംഗ് പ്ലാനില്‍ 100 മിനിറ്റ് കോളുകൾ, 5 ജിബി ഡാറ്റ 14 ദിവസത്തെ വാലിഡിറ്റി എന്നിവ നല്‍കുന്ന പ്ലാനിന് 1,691 രൂപയാണ് നിരക്ക്.
തായ്‌ലൻഡിലേക്ക് പോകുന്ന യാത്രക്കാർക്ക് 100 മിനിറ്റ് ഔട്ട്‌ഗോയിംഗ്, ഇൻകമിംഗ് കോളുകളുള്ള 1,551 രൂപയുടെ പാക്കാണ് അവതരിപ്പിച്ചിരിക്കുന്നത്.
യൂറോപ്പ്, കരീബിയൻ ദ്വീപുകള്‍ നിരക്കുകള്‍
2,899 രൂപ വിലയുള്ള യൂറോപ്യൻ റോമിംഗ് പ്ലാനില്‍ 32 രാജ്യങ്ങളെ ഉൾപ്പെടുത്തിയിട്ടുണ്ട്. 100 മിനിറ്റ് ഔട്ട്‌ഗോയിംഗ്, ഇൻകമിംഗ് കോളുകൾ, 5 ജിബി ഡാറ്റ, 100 എസ്.എം.എസ് എന്നിവ 30 ദിവസത്തെ വാലിഡിറ്റിയിൽ ലഭിക്കുന്നതാണ്.
1,671 രൂപയിൽ ആരംഭിക്കുന്ന കരീബിയൻ റോമിംഗ് പ്ലാനില്‍ 24 രാജ്യങ്ങളാണ് ഉളളത്. 150 മിനിറ്റ് ഔട്ട്‌ഗോയിംഗ് കോളുകൾ, 50 മിനിറ്റ് ഇൻകമിംഗ് കോളുകൾ, 1ജി.ബി ഡാറ്റ, 50 എസ്.എം.എസ് എന്നിവ 14 ദിവസത്തേക്ക് പ്ലാന്‍ വാഗ്ദാനം ചെയ്യുന്നു.