വാക്‌സിന്‍ രജിസ്‌ട്രേഷന്‍ മറയാക്കി ഡാറ്റ ചോരണം അഞ്ച് ആപ്പുകള്‍ക്കെതിരെ മുന്നറിയിപ്പുമായി സര്‍ക്കാര്‍
നിലവില്‍ cowin.gov.in എന്ന പോര്‍ട്ടലിലൂടെ മാത്രമേ രജിസ്‌ട്രേഷന്‍ ചെയ്യാനാവൂ
വാക്‌സിന്‍ ലഭ്യതക്കുറവ് മറയാക്കി ഓണ്‍ലൈന്‍ തട്ടിപ്പ് ലക്ഷ്യമാക്കി ഇറക്കിയ ആപ്ലിക്കേഷനുകള്‍ക്കെതിരെ കേന്ദ്ര സര്‍ക്കാരിന്റെ മുന്നറിയിപ്പ്. കോവിഡ് വ്യാപനം വര്‍ധിച്ചു കൊണ്ടിരിക്കുന്ന സാഹചര്യത്തില്‍ ഏതു തരത്തിലും വാക്‌സിന്‍ കുത്തിവെപ്പ് നടത്താനുള്ള ആളുകളുടെ ശ്രമമാണ് തട്ടിപ്പ് സംഘങ്ങള്‍ക്ക് തുണയാകുന്നത്. ദി ഇന്ത്യന്‍ കംപ്യൂട്ടര്‍ എമര്‍ജന്‍സി റസ്‌പോണ്‍സ് ടീം (സിഇആര്‍ടി- ഇന്‍) ആണ് മുന്നറിയിപ്പ് നല്‍കിയിരിക്കുന്നത്. എസ്എംഎസ് വഴി ഈ ആപ്പുകളുടെ ലിങ്ക് വ്യാപകമായി പ്രചരിക്കുന്നുണ്ടെന്നാണ് വിവരം. ആന്‍ഡ്രോയ്ഡ് ഫോണ്‍ ഉപയോക്താക്കള്‍ക്ക് ലഭിക്കുന്ന എസ്എംഎസില്‍ വ്യത്യസ്തങ്ങളായ അഞ്ച് എപികെ ലിങ്കുകളാണ് നല്‍കിയിരിക്കുന്നത്. Covid-19.apk, Vccin-Apply.apk, Cov-Regis.apk, Vaci__Regis.apk, and MyVaccin_v2.apk. എന്നിവയാണവ. ഇവ ഒരിക്കലും ഡൗണ്‍ലോഡ് ചെയ്യരുതെന്നാണ് സിഇആര്‍ടി നല്‍കുന്ന ഉപദേശം.