തോക്കുകളും മിസൈലുകളും നിര്‍മിക്കാന്‍ അദാനി; ഏറ്റവും വലിയ ആയുധ നിര്‍മാണ പ്ലാന്റ് ഉടന്‍
കാണ്‍പൂരില്‍ 1,500 കോടി ചെലവില്‍ 250 ഏക്കറിലുള്ള നിര്‍മാണ ശാല
ആയുധ നിര്‍മാണ രംഗത്തേക്കും പ്രവേശിച്ച് ശതകോടീശ്വരനായ അദാനി. വേഗത്തില്‍ വിറ്റഴിയുന്ന നിത്യോപയോഗ സാധനങ്ങളുടെ നിര്‍മാണം മുതല്‍ ഊര്‍ജ മേഖലയില്‍ വരെ സാന്നിധ്യമുള്ള അദാനി ഗ്രൂപ്പ് ആയുധങ്ങള്‍ നിര്‍മിക്കാനും ഒരുങ്ങുകയാണ്. ഉത്തര്‍ പ്രദേശിലെ കാണ്‍പൂരില്‍ 1500 കോടി രൂപ മുതൽ മുടക്കിൽ സജ്ജമാക്കിയിട്ടുള്ള നിര്‍മാണശാല അടുത്ത മാസം പ്രവര്‍ത്തനമാരംഭിക്കുകയാണ്.
250 ഏക്കര്‍ സ്ഥലത്തായിരിക്കും പ്ലാന്റിന്റെ ആദ്യഘട്ട പ്രവര്‍ത്തനങ്ങളെങ്കിലും പിന്നീട് വിപുലമാക്കും. അദാനി എന്റര്‍പ്രൈസസിന് കീഴിലുള്ള അദാനി ഡിഫെന്‍സ് എന്ന കമ്പനിയാണ് പ്ലാന്റിന്റെ മേല്‍നോട്ടം. ചെറു ആയുധങ്ങള്‍, ബുള്ളറ്റുകള്‍, അനുബന്ധ വസ്തുക്കള്‍ എന്നിവയാണ് അടുത്ത മാസം പ്രവര്‍ത്തനമാരംഭിക്കുന്ന പ്ലാന്റിൽ നിര്‍മിക്കുക.
തെലങ്കാനയിലെ അദാനി എയ്റോസ്പേസ് ആന്‍ഡ് ഡിഫന്‍സ് പാര്‍ക്കില്‍ കൗണ്ടര്‍ ഡ്രോണ്‍ സിസ്റ്റംസ്, മിസൈല്‍ ഡെവലപ്മെന്റ് ആന്‍ഡ് മാനുഫാക്ചറിംഗ് എന്നിവയ്ക്കായി 1,000 കോടി രൂപയും പുതുതായി നിക്ഷേപിക്കാന്‍ തീരുമാനമായിട്ടുണ്ട്.