അദാനിയുടെ ഒരു ദിവസത്തെ വരുമാനം ആയിരം കോടി; ഏഷ്യയിലെ രണ്ടാമത്തെ സമ്പന്നന്‍
മുകേഷ് അംബാനി തന്നെ സമ്പന്നരില്‍ ഒന്നാമത്
ഈ വര്‍ഷം 179 അതിസമ്പന്നരെ കൂടി സൃഷ്ടിച്ച് ഇന്ത്യ. ഇതോടെ രാജ്യത്തെ അതിസമ്പന്നരുടെ എണ്ണം ആയിരം കടന്നു. പത്താമത് ഹുറൂണ്‍ റിച്ച് ലിസ്റ്റ് പുറത്തിറങ്ങിയപ്പോള്‍ തുടര്‍ച്ചയായ പത്താം വര്‍ഷവും ഏറ്റവും വലിയ സമ്പന്നനായി റിലയന്‍സ് ഗ്രൂപ്പിന്റെ മുകേഷ് അംബാനി തന്നെ. രണ്ടാം സ്ഥാനത്ത് അദാനി ഗ്രൂപ്പ് തലവന്‍ ഗൗതം അദാനി തുടരുന്നു.
അദാനിയുടെ സമ്പത്ത് ഒരു വര്‍ഷത്തിനിടെ പ്രതിദിനം 1002 കോടി രൂപയാണ് വര്‍ധിച്ചതെന്ന് പട്ടിക വെളിപ്പെടുത്തുന്നു. മുകേഷ് അംബാനിയുടെ ആകെ സമ്പത്ത് 7.18 ലക്ഷം കോടി രൂപയാണ്. പ്രതിദിനം 163 കോടി രൂപയാണ് കൂട്ടിച്ചേര്‍ത്തത്. ഗൗതം അദാനിയുടെ ആകെ സമ്പത്ത് 5.05 ലക്ഷം കോടി രൂപയായി. 261 ശതമാനം വര്‍ധനയാണ് അദ്ദേഹത്തിന്റെ വരുമാനത്തില്‍ ഉണ്ടായത്. ഇതോടെ ഏഷ്യയിലെ രണ്ടാമത്തെ സമ്പന്നനായും അദ്ദേഹം മാറി. അതേസമയം മുകേഷ് അംബാനിയുടെ സമ്പത്തില്‍ ഒരു വര്‍ഷത്തിനിടെ ഉണ്ടായത് 9 ശതമാനം വര്‍ധന.